موقعة بورسعيد

فى موقعة بورسعيد شوفت الفلول حاضرين
وكل واحد معاه سنجه وسبع سكاكين
والأمن تايه ما بين حلق وماتحوشى
وشباب بيصرخ صريع لكن تقول يا مين
.......
فى موقعة بورسعيد كان الضمير غايب
وكل مسئول كبير طلع هناك خايب
واتهموا فى الالتراس والالتراس مظلوم
والعيب ماهوش فى الشباب العيب على الشايب
.......
فى موقعة بورسعيد كان الخداع موجود
والثعلب اللى انطرد عايز لجحره يعود
وكل ثعلب خبيث خلف البيبان هربان
عمل عمايل ليلتها تشيّب المولود
.......
فى موقعة بورسعيد كان الشباب بيموت
مابين ضمير فيه عطب والضرب بالنبوت
والغدر بالأبرياء طايح فى كل مكان
مستكترين على الشباب ليلة بفرحه يفوت
.......
فى موقعة بورسعيد شوفت الوطن مهموم
والحزن حاطط عليه والحزنانين بالكوم
وعزرائيل الدموع ماليه عنيه الاتنين
صعبان عليه الشباب اللى اتقتل مظلوم
.......
فى موقعة بور سعيد قالوا مافيش تقصير
فاكرين بأن الكلام بيوجهوه لحمير
مسلسل القتل فينا من زمان شغال
علشان فى قلب الميدان نادينا بالتغيير
.......