عم زواوي

عم زواوى شايل قفة فيها غناوة
لجل بهية تقرا وتسمع
إن الحب دا أصله حكاوى
قال ف بهية..
بحبك يا غالية
رغم السخام رغم اللجام
رغم البلاوى....
رغم إنى شايف رغم إنى سامع
فاتح ف خشمى.. أصلى حصاوى
سمعت ف غناك كل الحكاوى
كلت الأونطه ف خيرك تقاوى
رغم البلاوى رغم الفتاوى
صبغت الشعور بحنة وجاوى
وفوق منه ترمس لجلٍ يداوى
عِله ف قلبى فاهمها وعارفها
أخينا اللى غاوى..
بعت البخور ف قلب القهاوى
لجلك كمان عملت إنى حاوى
أدفع رشاوى وأقبض غناوى
كأنى ف هواك علامة يساوى
ورغم الأسية.. بتجرى ف دمى
وساكنة ف قلبى وبيت الكلاوى
بخُطرى يا غالية عملت حصاوي
لكن غصب عنى عملت إنى حاوى
لجل ينوبنى كبشه رشاوى
ولا هديه قيمتها تساوى
ربع المحبة وربع عكاوى
أصل الغلابة دايما رغاوى
زيطة ودوشة لكن فى النهاية
قد ما يملك... علامة تساوى
عم زواوى مصرى صريح
ساعة الحق.. لسانه فصيح
يهوى بهية بدون تجريح
أصل كرامته تاج على هامته
مهما يقاسى مهما يواجه أعتى الريح
دايما يضحك ولا يلاغى ساعة الصبح
بوش مليح..
يشغل ف وقته بذكر المولى
أو أحيانا بالتسبيح
يوم تلاقيه عند الساقية
ويوم يرويها بالتفاريح
ويوم تلاقيه قافل مخه
ومربطها بالمفاتيح
عم زواوى دا راجل طيب
مهما يقاسى ولا يعانى
يهوى بهية بالتصريح
أو يهواها بالتلميح
ولا يرضى لها بالتجريح