النائب ده هيجننى

وعُوده كتيرة وفيها أحلام
كان بيقوللى أحلى كلام
ولمَّا بينجح يقسى علينا
حتى ما رد علينا سلام
صوته هادى كمان ورقيق
ودعايته مالية كل طريق
ولمَّا بينجح ينسى همومنا
وأزمة لحمة معاها دقيق
بيجى يعزى حزين بجد
يبكى ويمسح دمع الخد
ولمَّا بينجح نلقى سراب
كإنه ما يعرف فينا حد
**
كان بيخلَّى الجو عطير
حياتنا هتبقى كباب وفطير
ولمَّا بينجح يجى يسافر
وكل كلامنا معاه بيطير
أنا محتار بجد حقيقى
كان بيقوللى أنت صديقى
ولمَّا بينجح كله اتغير
أطلب خدمه ينشف ريقى
بيقول أنتوا أهلى وناسى
جميلكم شايله أنا فوق راسى
ولمَّا بينجح نجرى وراه
طلباتنا ياخدها ويروح ناسى
ياما إدانا حضن وبوس
وماشى بيدى غلابة فلوس
مشاكلنا بجد عارفها فين
ويجى فوق الجرح يدوس
يخطب لينا يصول ويجول
هتاكلوا لحمة بدل الفول
ولمَّا بينجح نبعت شكوى
نلاقى الرد علينا يطول
قبل العيد يبعت لى تهانى
عمرى ما رايح أبقى أنانى
ينجح ألاقى قريبه اتوظف
ويسيبنى فقير لوحدى أعانى
كان بيزورنا ليل ونهار
ويقول خدمة أهلى شعار
ولمَّا بينجح أطلب حقى
ألاقى دليلى معاه احتار