رجعنى على التحرير.. قصيدة جديدة لأشرف الشافعى

يا وابور الساعة اتناشر رجعنى على التحرير
من يوم الثورة ما قامت وما حستش بتغيير
وجعوا دماغنا بحاوراتهم
خنقونا بمناورتهم
أحلامنا غير خرافتهم والفرق مابينا كبير
ياوابور الحال ف بلدنا بقى زى اللوغريتمات
ولا جيبنا حق ولادنا ولا بان للخير علامات
إزاى ندخل ف معاهدة
على إيه نستنى ونهدى
وأزاى يرتاحوا الشهدا لو ماحصلش التطهير
ياوابور الساعة اتناشر خلصنا الصبر خلاص
لا لمحنا فجر مقرب ولا فيه م العتمة خلاص
قلنا ح نطلع ونجيبه
ماهو مش ممكن حنسيبه
واللى مآمن بنصيبه مايخافش من التحذير
ياوابور الساعة اتناشر تلتين العمر أهو ضاع
زارعين الخير ف دروبها مابنجنيش إلا ضياع
ياوابور أخدوها أسيرة
ولا جابوا عنّها سيرة
صبحت أرواحنا كسيرة ومادقناش طعم الخير
ياوابور الساعة اتناشر إحنا تعبنا وملينا
وكبرنا ف عين الدنيا بس ف عينهم قلينا
سجنونا وسرقوا آملنا
قتلوا الأحلام ف خيالنا
طب ح نقول أيه لعيالنا ده حسابنا حيبقى عسير
ياوابور الساعة اتناشر بيقولوا إن أنا مستعجل
وأنا عايش عمر بحاله عمال ف الحلم بأجل
ولا كل تأنى سلامة
ولا كل العجلة ندامة
ربك ورانى علامة ودا إنذار ليا أخير
ياوابور الساعة اتناشر ودينى على الميدان
إخواتى هناك وأنا نفسى بينهم ألحقلى مكان
ياوابور وحشتنا اللمة
فرَقنا اللى مايتسمى
وأنا مش راجع غير لما يتحرر حلم أسير
ياوابور ف الوضع الراهن الموت بقى يسوى حياه
واللى على العسكر راهن حتموت أحلامه معاه
مش رح اطبطب وأغازل
ولا ح أقبل تانى أتنازل
أنا سايب أهلى ونازل علشان أحدد لى مصير
نتقابل فى التحرير!!