نداء اإلى عصام شرف

عصام شرف يا حبيبى أنت فين أراضيك
من يوم ما سيبت الميدان وأنا بنادى عليك
وكل يوم التقيك عن الولاد مشغول
مشغول بإيه والأمل حاطينه كله فيك؟
.......
مش دا اتفاقنا زمان اللى اتفقنا عليه
غيرت ليه الكلام ونسيت حبايبك ليه؟
بيقولوا إنك بقيت العبد للمأمور!
وكمان ملكشى مكان ولا كرسى تقعد فيه!
.......
لو الحكاية كده سيب المكان وامشى
خليك ياراجل جدع وانطق ماتسكوتشى
خلينا نقدر نشوف كل الورق مع مين
ولا أنت يعنى كمان هاتقول ماتعرفشى!
.......
إحنا صبرنا عليك شهرين ورا شهرين
لما اتحرق دمنا وولادنا فى الزنازين
هانقوم بثورة ونطلع للميدان تانى
يا تقول لنا باختصار اللى مرازينا مين؟
.......
الصبر طال والأمل خايف لابكره يضيع
ولو يضيع الأمل بكره هايبقى فظيع
تتساوى فيه الحكاية بين الحياة والموت
وساعتها مش راح يفيد اللى انقطع ترقيع
.......
يا (عصام) كتاب التاريخ فاتح عليك صفحات
وناوى يكتب (عصام) كان حى لكن مات
وضيّع اللى الشباب أمنوه ف ليله عليه
كان عنده فرصة وضاعت بين خنوع وسُكات
.......
سيد احمد الهمشرى