عمر كمال لتليفزيون اليوم السابع: بزعل لما بيقولوا عليا مطرب مهرجانات.. فيديو

قال المطرب عمر كمال خلال حواره مع تليفزيون اليوم السابع، إنه فى بعض الأوقات يشعر بالضيق عند تقديمه على أنه مطرب مهرجانات وفقط، وأوضح فى رده على سؤال حول تصنيفه كمطرب مهرجانات فقط: فى أوقات بضايق لما أتقدم إنى مطرب مهرجانات، وده لأن نظرة الناس للمهرجانات مش كويسة، بيقال دول بتوع هلس وملهمش لازمة، ودول ليهم وقتهم وخلاص، متابعا: أنا أضايقت من بوستات اتكتبت وقت حفل نقل المومياوات، لما اتقال فين عمر كمال ولا بيكا ولا حسن ولا ساسو، مصر مش الزمالك وجاردن سيتى وبس، مصر إمبابة والوراق وعين شمس، أنا من حقى أحلم وأغنى، أنا بعبر عن طايفة فى مصر، مش كل الناس دخلت مدارس أجنبى، ومش كل الناس اتعلمت كويس".
وأضاف خلال حوار مع تليفزيون اليوم السابع، أجرته شروق وجدى، وأعده عادل عبد الله: أنا كنت بغنى غنا عادى مش مهرجانات من 14 سنة ومحدش عرفنى، لكن لما غنيت مهرجانات اتشهرت".
وتحدث كمال عن مشاركته فى أعمال رمضان من خلال أغانيه وقال: "ربنا كرمنى وعملت أكتر من عمل كويس، منها تتر مسلسل أحسن أب، وأغنية فى مسلسل النمر بطولة محمد الإمام، وأغنية فى مسلسل ياسمين عبد العزيز وأحمد العوضى، وشاركت فى مسلسل الاختيار بأغنية".
وتابع عمر كمال: "أنا اتظلمت فى رمضان اللى فات، لأن الناس كانت واخدة فكرة إنى مطرب مهرجانات بس، وبالتالى مترشحتش فى حاجة، لكن الحمد لله السنة ديه عملت أغنية هنلبس عساكر مرتين مرة للجيش ومرة للشرطة والحمد لله اتقبلت وبتتذاع".