الصابرة

صبرتى على الألم والصبر طال بيكى
يا أم الجروح والآلم والحزن عاش فيكى
سنين وأيام على أمل حد يداويكى
زادت جروحك وآلامك ولا حد حاسس بيكى
صابرة يمكن تلاقى حد يخفف دمعك
ولا بكلمة أبنى تلقى الوليد سمعك
زاد الجافا ضاع الوفا من أهلك ومن ناسك
داسوا عليكى حكامك وراموكى حراسك
نسوا فضلك نسوا خيرك نسوا صدر الحنين نيلك
حطوا الهدف دم الشعوب مصوه حتى الرغيف أكل الفقير سخطوه
ردوا الجميل رد الخسيس للخير
فتحوا السجون زاجوا الشريف على الغير
وأنتى واقفة بتنظرى يمكن يحنوا عليكى
والله لو فى خشى كانوا باسوا إديكى
إديكى شريانان أصلهم واحد
من أعلى بلاد النوبة أصل الشعوب واحد
انفردوا بسطوا الخير من دمياط لرشيد
خلوا زمام الخير يرسم لنا سجادة
مرة نصلى عليها نحصد ثمار أرضيها
وهى راضية بتدى وبتشكر الرحمن
الظلم زاد والفقر ساد والفجوة وسعت قوى
خلت ولادك يخرجوا اللى من صلبك ومن طينك
شالوا حاجز الخوف حطموا زنازينك
عدوا فى وسط الرصاص فجروا براكينك
على كل قلب أسود آسى على أمه
حطوا فى أيده الحديد يمكن يعود لأمه
بكت الأم على عيالها مرات
مرة على اللى ظلم وسنين على اللى مات
شهيد ثورة يناير وأهله فى الجنة
بإذن مولى كريم يا رب أكتبهلنا
ننول الشهادة فيكى وتعيشى لأجيالنا
يجنوا ثمار الخير مسلم ونصرانى
على أرض طيبة الغالية صلى المسيح والعذرا
وعمرو بن العاص أمن جموع الناس
وبنوا دور العبادة مسجد ودير كاترين
عاشوا الجميع فى أمان من مصر لفلسطين
ماتيلاه بينا نحرر القدس يا أهل الدين
ونقول للصابرة قومى جيلك صلاح الدين