امسك فى الثورة

أمسك فى الثورة ومتسبهاش علشان دمك ما يروحش بلاش
خلينا مع بعض الأيد فى الأيد علشان الخوف ما يفرقناش
وبلاش نتزاحم فى الطوابير الخير بالحب ها يبقى كتير
دا الدنيا ما بين المتخاصمين تافهة ورخيصة وما بتسواش
......
أمسك فى الثورة وما تسبهاش وبروح الثورة عيش على طول
الصبر زمان حرق الدكان خلى الأيام شىء مش معقول
وأنا وأنت يا صاحبى بقالنا سنين على لقمة بملح يا دوب عايشين
وأدينا بقينا كُبار ثوار حطينا صبعنا ف عين الغول
......
أمسك فى الثورة وما تسبهاش وتعالى معايا فى حضن النيل
راح نبذر ورد وقمح كتير وهانجنى القطن أبو شعر طويل
وبهية تغنى معايا ومعاك والشمس تخش من الشباك
ودموع الفرح تبان ف عيون مشتاقة تشوف الوادى جميل
......
أمسك فى الثورة ومتسبهاش ولغير الخالق متوطيش
متبعش العمر الغالى بلاش هانكون أحرار يا نموت يا نعيش
وبروح الثورة فى كل مكان خليك فارس حر وإنسان
خلى ضميرك دايما وياك وإيديك فى إيديّه وما تسبنيش
......
أمسك فى الثورة ومتسبهاش هاتلاقى الرزق كتير فى أيديك
ماتسبش شيطان وسواس خناس هو اللى يمشى كلامه عليك
سيان من فينا يكون قدام دا كفاية أنا وأنت نعيش فى سلام
وكفايه عليه ف كل صباح فرحتى والفرح باين فى عنيك
......