كنا فين وبقينا فين؟!

قصص وكلام وحقايق وتاريخ ومواقف وحاجات كتير أوى كنا عارفينها وعايشنها قبل الثورة، اتغيرت وبقت حاجات تانية خالص بعد الثورة.. حاجات كنا بنسمعها ونقراها ونشوفها اتغيرت وبقينا نسمع ونقرى ونشوف حاجات عكسها وحاجات كنا بنعملها اتغيرت وبقينا نعمل عكسها، منها اللى اتغير للأحسن ومنها اللى اتغير للأسوأ ومنها اللى يضحكنا.. يعنى مثلا قبل الثورة مبارك كان بطل حرب أكتوبر وأول واحد شمر وطار.. بعد الثورة مبارك مارحش الحرب أساسًا، تقريبا كان فى الحمام ساعتها.
قبل الثورة مبارك كان چان ووسيم فى كل صوره اللى كانت محاوطانا فى كل حتة.. بعد الثورة كل الصور اللى اتنشرت لمبارك، شكله مش ولابد فيها.
قبل الثورة السلفى يقولك مالناش فى السياسة ويجب إطاعة الحاكم حتى لو ظالم و... بعد الثورة السلفى نازل الانتخابات والخروج على الحاكم حلال.
قبل الثورة الإخوانجى يخاف لو شاف بوكس جاى عليه.. بعد الثورة وزير الداخلية بيحضر حفلات الإخوان ويتصور معاهم.
قبل الثورة كل واحد كان بيحترم رئيسه فى العمل ويسمع كلامه ويخاف يزعله... دلوقتى كل رئيس فى العمل بيعمل ألف حساب للى تحته ويخاف يزعله.
قبل الثورة كان قليل أوى لما نشوف واحد معاه مطواة أو أى سلاح من أى نوع... دلوقتى قليل أوى لما نشوف واحد ماشى من غير سلاح.
قبل الثورة كان جمهور الكورة بيقعد فى المدرجات واللعيبة فى أرض الملعب... بعدها الجمهور بيقعد فى أرض الملعب واللعيبة فى المدرجات.
قبل الثورة مكنش فى حد يقدر يمشى بالعربية مخالف ع الطريق.. بعدها محدش فيكى يا مصر معاه عربية إلا ما مشى مخالف مرة أو مرتين ع الأقل.
قبل الثورة الريان كان حرامى ونصاب... بعدها الريان طلع بطل قومى واتظلم من النظام.
قبل الثورة اللى كان بيهاجم الحكومة، كان بيختفى سنتين.. دلوقتى اللى بيهاجم الحكومة بيخنقنا فى كل برامج التليفزيون ده إن مابقاش مذيع وله برنامج لوحده.
قبل الثورة كلنا كنا بنفكر فى مصلحتنا وبس.. بعدها كتير مننا بيفكروا فى مصلحة البلد وبس.