رسائل السيسى للمصريين من الإسكندرية: البناء غير المخطط والتعدى على الأرض الزراعية لا يقل خطرا عن سد النهضة.. ويؤكد: القنوات المسيئة بتكلمكم بما لا يرضى الله.. ويتساءل: هل اللى يبنى جامع لربنا يسرق أرضه؟

السيسى: حجم ناتج التصالح في مخالفات البناء حتى الآن 10%
الرئيس: "جهد الدولة هيخلى الدين داخل الحدود الآمنة.. ويا نبنبى بلد يا نتوقف"
السيسى للمواطنين: قبل ما تطلب منى خدمة إنت كمان ساعدنى فى تنفيذ اللى بنقول عليه
الرئيس للمصريين: لو مش عاوزنى مفيش مشكلة.. والدولة مينفعش تغيب تانى
السيسى: فيه طلبة بتخرج تدرس بجامعات بالخارج تكلفتها 35 ألف دولار سنويا
الرئيس: لم يحدث أى نقص فى السلع الأساسية خلال أزمة كورونا

افتتح الرئيس عبدالفتاح السيسي، عددا من المشروعات القومية بنطاقة محافظة الإسكندرية، وتحدث الرئيس عن عدد من الملفات الشائعة والتي يأتي على رأسها مخالفات البناء، حيث أكد على خطورة هذا الملف بشكل يشبه خطر قضية سد النهضة، مشددا على أن الدولة لم تتخذ أي إجراء صارم تجاه هذا الملف بشكل مفاجئ، حيث تم الحديث عنه منذ 3 سنوات.، كما تطرق الرئيس إلى القنوات المسيئة التي تعمل على تقليب الرأي العام من خلال قلب الحقائق، محذرا من الانزلاق وراء الشائعات التي لا ترضى الله سبحانه وتعالى".

وأكد الرئيس عبدالفتاح السيسي، أن مخالفات البناء تحد خطير تواجهه الدولة المصرية، مضيفا: "صدقوني البناء غير المخطط خطير جدا مش عاوز أقول بنفس النسبة لموضوع سد النهضة ..واللى واضح لينا موضوع المية واللى مش واضح لينا هو التعدي على الأراضي الزراعية.. بدل ما تبنى في الأرض الزراعية فيه ظهير صحراوي ، علشان ثقافة ولادنا يبقوا معانا ستدمر كثير من قدراتنا..هو فيه حد ماشي بعربيته نقول ادفع المخالفة وبيبقا مبسوط لا بيبقى زعلان".

وقال الرئيس السيسى خلال افتتاح عدد من المشروعات القومية في الإسكندرية، "الموضوع ده مش مسؤولية الحكومة والرئيس بس دى مسؤوليتنا كلنا إن إحنا نحافظ على بلدنا وننظم هذا الملف لأن ملايين بيتأثروا".

وواصل الرئيس: "الموضوع شائك وأى حد تاني يقول متدخلش في الكلام ده وسيب الإعلام يتكلم فيه، لا هتكلم في كل مصلحة ولن أبيع الوهم للناس تحت اعتبارات السياسية والحفاظ على الشعبية.. وعملنا كده في الاقتصاد وهو ده الرصيد اللى عدينا بيه.. أى عمل صالح حتى لو الناس مش راضية عنه أنا هعمله".

وتابع الرئيس السيسى: "أنتوا هتتألموا منه أنتوا مش عاوزين تساعدونى ليه ومٌصرين على مواقفكم بتحلموا ببلد كويسة ومنظمة ومترتبة وزى الفل، ولا كل واحد عاوز يعمل اللى هو عاوزه.. بنجيب مبنى يتزال في التليفزيون حد بيتكلم عن شكل أعمق وأكبر ومدى التأثير الخطير على مصر نتيجة هذا التجاوز، لكن مش بنهد مبنى وخلاص.. خاطب عقل الناس والناس من حقها تفهم أمنها ومستقبل أولادها".

السيسى للمصريين: القنوات المسيئة بتكلمكم كلام لا يرضى ربنا"
وأكد الرئيس عبدالفتاح السيسي، أن محور المحمودية سيعطي حرية حركة بالإسكندرية ودائما سنجد من يشككون في المشروعات التي ننفذها، مضيفا: "فيه ناس بتتكلم بشكل سلبي عن الإجراء، كان فيه 30 مسجد وتعديات أخرى والقنوات المسئية بتقول بيهدوا مساجد ربنا، والله لا يرضي ربنا سبحانه وتعالى.. بس هما ميعرفهوش.. ويقولوا بيهدوا جوامع ربنا، استغفر الله العظيم".

وتابع الرئيس: "هناك حملات تشكيك في كل المشروعات التي تقوم بها الدولة، متابعا: "في كل مشروعاتنا اللى بنعملها هتجدوا تشكيك وتجدوا ناس بتتكلم بشكل سلبي على اللى إحنا بنعمله، ولكن الهدف من هذه المشاريع هي المصلحة للكل، والقنوات المسيئة اللى عاوزة دايما تكلمكم كلام لا يرضى ربنا".

وقال الرئيس السيسى: "يا رب تبقوا زينا في إن انتوا تعملوا حساب ربنا.. أنتوا بتخربوا الشعوب وتدمروها وتدمروا الأمم وتضيعوها، جايين تتكلموا علينا لما بنبنى ونعمر.. هو ده المنظر اللى كنا بنتعاير بيه ويقول شوف المصريين وشوف فقرهم وخيبتهم عاملة إزاى".

وتابع الرئيس: "إحنا بنفتتح وسعداء والبحيرة فيها 77 جامع مخالف على حرم الترعة، اللى عاوز يبني حاجة لربنا يسرق أرضه؟، دى سرقة وعلى الرغم من كده هنشيل وهنعمل مكانها".

ووجه الرئيس، محافظ البحيرة لعمل محاور على كل ضفة وإنشاء مساجد بديلة بنفس النمط، قائلا: "بشكرك وأنا معاك والدولة معاك نعمل 4 محاور على كل ضفة ونعمل المساجد بنفس النمط ومساكن لأهلنا اللى اتعدوا لكن إحنا بنحاسب نفسنا التجاوز اللى تم إحنا ندفع تمنه مش الناس".

السيسى: حجم ناتج التصالح في مخالفات البناء حتى الآن 10%
وأكد الرئيس عبدالفتاح السيسي، أن الدولة لم تتخذ إجراء حاد لمواجهة مخالفات البناء دون سابق إنذار، مضيفا: "مخدناش إجراء حاد في مخالفات البناء بدون إنذار احنا قايلين الكلام ده من 3 سنين وادينا مهلة لنفسنا 6 شهور، وقلنا التصالح وكلام من هذا القبيل".

وأضاف الرئيس: "حجم الناتج اللى اتعمل خلال الفترة السابقة 10% أو أقل، وحصل تعدي خلال نفس الفترة أو يتجاوزهم".

السيسي: لم يحدث أي نقص في السلع الأساسية خلال أزمة كورونا
وأشاد الرئيس السيسي بجهد وزير التموين خلال السنوات الماضية، قائلا: "خلال الفترة الماضية لم يحدث أى نقص في أى سلع أساسية رغم تحدي أزمة كورونا.. كان طبيعى إن إحنا نتعرض لأزمة زى كده.. جهد وزارة التموين والدكتور على مصيلحى خلال الفترة الماضية مفيش أي نقص في السلع الأساسية حصل أو اختناق أو شكل من تسعير غير دقيق أو تلاعب في الأسواق".

وافتتح الرئيس عبدالفتاح السيسي، عبر تقنية الفيديو كونفرانس مجمع صوامع مدينة برج العرب بالإسكندرية بطاقة 90 ألف طن.

السيسى: البناء غير المخطط والتعدي على الأراضى الزراعية بنفس خطر سد النهضة
وقال الرئيس عبدالفتاح السيسي، إن المواطنون متألمون من إجراءات الدولة لضبط مخالفات البناء، متابعا: "المواطنين كتير منهم متالم ومضايق من موضع إجراءات الدولة لضبط المخالفات البناء سواء الاراضى الزراعية او دون ترخيص".

وأضاف الرئيس: "محدش بيتكلم في الموضوع ده كويس ، ملهومش دعوة بيه، علشان محدش يزعل، وأنا مش طبيعتى معاكم كده يا مصريين، إحنا قدامنا تحدى وطلعتوا قدامكم وقلتلكم التحدى ده خطير علينا والاستمرار عليه يدمر الدولة المصرية".

وواصل الرئيس: "كنتوا بتتكلموا وخايفين من موضوع سد النهضة وصدقوني البناء غير المخطط والتعدي على الأراضى الزراعية خطير مش عاوز أقول بنفس نسبة سد النهضة، بس الناس مش شايفاه، والواضح لينا موضوع المياه، واللى مش واضح لينا الاستمرار في التعدى على الأراضي الزراعية والبناء غير المخطط ".

السيسى: "جهد الدولة هيخلي الدين داخل الحدود الآمنة.. ويا نبنبى بلد يا نتوقف"
تطرق الرئيس عبدالفتاح السيسي، للكلام المثار حول حجم الدين العام والخارجي، وقال إن الاقتراض بأرقام ميسرة الى حد كبير لأن فيه كلام كتير بيتقال على الدين العام والخارجي، وبالتالي محتاجين اننا نوضح للناس إن إحنا منقدرش نتوقف عن ده مع الوضع في الاعتبار نقطة مهمة وهى إن قياسات الدين وإن كانت عالية ولكن جهدنا كدولة في ضبط هذا الدين وزيادة حجم النتاج القومي هيخليه داخل الحدود الآمنة".

وأضاف الرئيس خلال افتتاح عدد من المشروعات القومية بالإسكندرية: "انتبهوا لتاثيرات كورونا على الدنيا كلها ولو كانت الأمور مشيت طبقا للتخطيط حتى للدين.. موجها حديثه لوزير المالية الدكتور محمد محمد معيط: "أتكلم في النقطة دي بتاع الدين لأن فيه كلام مش عاوزين نسيب الناس في مصر حد أبدا بيأثر سلبا على فهمهم .. إحنا يا نبنبى بلد يا نتوقف".

السيسى للمواطنين: قبل ما تطلب مني خدمة ساعدنى فى تنفيذ اللى بنقول عليه
وأكد الرئيس عبدالفتاح السيسي، أن مصر هي الدولة الوحيدة التي يتحدث وزرائها عن الافتتاحات على الهواء بهدف مشاركة الجهد المبذول والتكلفة والتحديات التي واجهت تلك المشاريع، مضيفا: "مفيش حد في العالم كله بيقعد يفتتح مشروعات ويتكلم ويسمح للوزراء انهم يتكلموا على الهوا الا احنا في مصر تقريبا مفيش حد في العالم بيعمل كده الا احنا، والهدف مشاركة الجهد المبذول والتكلفة والتحديات".


وأشار الرئيس، إلى تكلفة صيانة معدات المشروعات، قائلا: "تشغيل المعدات وصيانتها 10% من الأرقام المسجلة، ولو محصلش ده ستراجع حجم الإنتاج وده صيانة للى اتعمل.. بشرح وبتكلم كتير علشان تبقوا عارفين حكايتنا..الصيانة 17 مليار والتشغيل بكام في السنة؟ ، تشغيله بفلوس وصيانته بفلوس وألا يتراجع الإنتاج.

وأضاف الرئيس: "منبقاش عاوزين نعمل ده كله وتحملونا بأعباء وتعمل نمو غير مخطط للمشروع وترجع تقول إن المشروع مش قادر يشتغل، طبعا اللى بيتعمل فيها مش مترتب ومخطط.. لما نيجي نعمل تخطيط ويتنفذ طالما داخل الإطار يبقا مفيش مشكلة.. وهيصحل فقد للقدرة والأداء وبعدين نقول الدولة مٌقصرة معانا، قبل ما تطلب مني خدمة أنت كمان ساعدني في تنفيذ اللى إحنا بنقول عليه.. يبقى الموضوع طرفين الدولة والمواطن في تشارك المسؤولية.. مش هننجح إن إحنا نوصل ده طالما فيه تجاوز.. من فضلكم شوفتوا مصر في العشرينات وإسكندرية العشرينات وهتجدوا أن الفاصل كبير بس مش إيجابي.. يا ترى إيه اللى خلانا كده وإيه اللى حصل في الخمسين ستين سنة اللى فاتوا اللى خلانا متراجعين كده".

السيسي للمصريين: لو مش عاوزني مفيش مشكلة.. والدولة مينفعش تغيب تاني
وأكد الرئيس عبدالفتاح السيسي، أن الدولة أنفقت 350 مليار جنيها على محافظة القاهرة خلال الفترة الماضية، مضيفا: "صرفنا على محافظة القاهرة ما يقرب من 350 مليار جنيه، ولو صرفتهم في العاصمة الجديدة هتغطي جزء كبير جدا من المرافق بحجم نصف الاراضى..وحجم المصروفات في الإسكندرية خلال 40 سنة والله لا يساوي إن احنا كنا نعمل مدينة جديدة في سيدي كرير بعمق 10 كيلو كنا عملنا مدينة جديدة وحديثة".

وحذر الرئيس خلال افتتاح عدد من المشروعات التنموية بمدينة الإسكندرية، من غياب الدولة مرة أخرى قائلا: "غابت الدولة بس مينفعش الدولة تغيب تانى وإن غابت تاني وبالمناسبة انتوا كده بتأجلوا التطوير 100 سنة ولو غابت مصر تاني احنا بنأجل 100 سنة ومقدرش أقبل كده .. الناس هتبقى مضايقة وزعلانة ميجراش حاجة.. ولو مش عاوزينى أبقى موجود هنا أنا معنديش مشكلة.. بس أنا لا يمكن أبقى موجود في مكان إلا والإصلاح قدام عنيا وامسك فيه واخلصه بما يرضى الله سبحانه وتعالى.. والله غالب على أمره".

السيسى: فيه طلبة بتخرج تدرس بجامعات خارج مصر تكلفتها 35 ألف دولار سنويا
دعا الرئيس عبدالفتاح السيسي، أهالى الطلبة الذين التحقوا بالكليات الأهلية الجديدة إلى الاطمئنان، متابعا: "جبنا كل العلوم الجديدة علشان يبقوا جاهزين لسوق العمل"... بندرس حاجات كتير ملهاش سوق في مصر، طيب ناخد الجديد ومتقلقوش منهم وستجدوا هذا الكلام مفيد جدا".

وأضاف الرئيس خلال افتتاح عدد من المشروعات التنموية بمدينة الإسكندرية: "حجم الطلبة المصريين اللى بيخرجوا بره مصر علشان يدرسوا .. فيه حجم معتبر من الأسر بتوفد أبنائها للخارج فيه جامعات معتبرة ومتقدمة جدا ونسجلها تقدير الجهد والدور والشهادة اللى تعطيه لأبنائها وفيه جامعات تاني لأ، من غير ما أذكر جامعات.. تكلفتها 35 ألف دولار سنويا وفيه حاجات أقل.. وفى الآخر بيخرج ومش ده المستهدف، الفكرة فكرة تعليمية إنه بدل ما يسافر ياخدها هنا".

ووجه الرئيس السيسي المسؤولين إلى ضرورة ربط التعليم بسوق العمل، مختتما: دوروا على ربط التعليم بسوق العمل وجامعتنا بتخرج مئات الآلاف ويمكن مش كلهم مربوطين بسوق العمل".

بدروه، أكد الدكتور خالد عبدالغفار وزير التعليم العالى أن عدد الطلبة المصريين الذين يدرسون بالخارج وصل إلى 20 ألف طالب، ينفقون 20 مليار جنيه سنويا بخلاف العملة الصعبة وهجرة العقول.
السيسي
الإسكندرية
بشاير الخير
المشروعات القومية
محور المحمودية
الرئيس السيسى
البناء المخالف
اليوم السابع بلس
الموضوعات المتعلقة
رسائل الرئيس السيسى فى افتتاح المشروعات القومية بالإسكندرية.. إنفو جراف
السبت، 29 أغسطس 2020 01:15 م
السيسى: "فيه طلبة بتدرس فى جامعات بالخارج تكلفتها 35 ألف دولار سنويا"
السبت، 29 أغسطس 2020 01:15 م
السيسى للمصريين: "لو مش عاوزني معنديش مشكلة.. والدولة مينفعش تغيب تاني"
السبت، 29 أغسطس 2020 12:36 م
السيسى: "جهد الدولة هيخلى الدين العام والخارجى داخل الحدود الآمنة.. ويا نبنبى بلد يا نتوقف"
السبت، 29 أغسطس 2020 12:13 م
السيسى: التعدي على الأرض الزراعية والبناء غير المخطط يساوي خطر سد النهضة
السبت، 29 أغسطس 2020 12:11 م