حصاوى يدلى بحديث

(اتفقت صحفية أوروبية مع حصاوى على حديث صحفى، فأخذها إلى حانة واشترط عليها أن تدفع حساب مشروباتها).
حصاوى: (للجرسون) نزل لها قزازة ويسكى على حسابها.
الصحفية: وقزازة صودا (لحصاوى).. كولى بقى هصاوى إيه عيوبكم فى الشرق؟
حصاوى: ما لناش عيوب خالص، الكذب خيبة.
الصحفية: أنا موش يصدق أنتى، إهلفى.
حصاوى: مقدرش أحلف لأن الحلفان بالكدب حرام.
الصحفية: أوكى.. ممكن أأرف إيه مزاياكم؟
حصاوى: مزايانا ما لهاش عدد.
الصحفية: ما لهاش أدد يأنى صفر.
حصاوى: لا يعنى كتيرة بحيث مستحيل نعدها كلها.
الصحفية: زى إيه؟
حصاوى: أول ميزة أننا عرب وأنتم لأ.
الصحفية: يعنى أنتى مش مصرى؟
حصاوى: لا مصرى وعربى برضه.
الصحفية: يعنى أفريكى ولا آسيوى؟
حصاوى: أفريقى وآسيوى برضه ومن دول البحر المتوسط يعنى جيرانكم برضه.
الصحفية: أنا مش يفهم لكن أوكى، وإيه تانى ميزة فيكم؟
حصاوى: إننا بنستخدم اختراعاتكم من غير ما نكون تعبنا فيها.
الصحفية: لكن بتدفأوا تمنها.
حصاوى: دى بتدينا ميزة عليكم، لأننا لو ما اشتريناش منكم تبقوا فقرا.
الصحفية: والأرب لو ما اشتروش سلاهنا يبقوا ضعاف.
حصاوى: إحنا دعاة سلام ومش عايزين نحاربكم.
الصحفية: آمال ليه أرب يشتروا السلاه؟
حصاوى: عشان يحاربوا بيه بعض.
الصحفية: ويهاربوا بأض ليه؟
حصاوى: عشان يحققوا الوحدة العربية.
الصحفية: ومش جلط الوهده بالكوة؟
حصاوى: الوحدة تخلينا قوة ونهزمكم لما تحاربونا.
الصحفية: بالسلاه بتاعنا؟ أوكى، وإيه ميزاتكم كمان؟
حصاوى: أنتو عندكم نظام، ودا عيب خطير لأنه يخنق الواحد، إنما إحنا عندنا حرية.
كل واحد وكيفه.
الصحفية: وأنتى كيفك إيه؟
حصاوى: أنا ماليش كيف لحاجة، لا بشرب حشيش ولا بانجو.
الصحفية: عشان هرام؟
حصاوى: فيها قولان، بس هو ممنوع قانونا، الخمره اللى بتشربوها هى اللى الحرام.
الصحفية: وأنتى موش تشربى همره؟
حصاوى: إطلاقا، إلا فى المناسبات. زى دلوقت، أنا بشرب عشان أجاريكى.
الصحفية: ولا أشان الهمره تديكى شجاعة وأنتى بتكلمى أنا؟
حصاوى: أيوه، مش ملاحظة أنى بكلمك بصراحة؟
الصحفية: أنا ملاهظة أنك سكرتى.
حصاوى: أنتى اللى خلصتى الويسكى.
الصحفية: أنا شربت الصودا، أهنا موش نشرب همرة وأهنا بنشتجل. أدى هساب الصودا، جود باى هبيبى.
حصاوى: (صارخا خلفها) طب وحساب الويسكى يا كافرة؟