الخفافيش هتبات مذلولة

موضة ولفت كل وطنا
ومصر بلدنا هى الأولي
الشعب العربى لينا بيقلد
قدوة وليهم مش معقولة
شفنا فلانة وشفنا سوزان
موضة وطلعت سيدة أولى
وشفنا الشلة حوالين هانم
وشفنا لسان ما يبلش فولة
وطلعت ليلى وطلعت هايلة
وشفنا الخايلة وشفنا الحولة
واللى تطلع قوانين فاسدة
وتدور تندب أنا مسئولة
وشفنا ولادهم ظهروا وبانوا
بالكربون نسخة ومنقولة
مع بشار أو مع قذافى
وولاد صالح ياخدوا عمولة
كله فساد م الساس للراس
سرقة ونهب وهيصة مهولة
وشعوب عايشة تحت الفقر
جوع ومهانة إبقاق مقفولة
سجون مليانة بكل معارض
ينطق كلمة ويقول قولة
وفى الإعلام سامعينه كلام
ووعود جامدة وعود معسولة
بيخدروا إحساس الناس
حقنة ف رِجل خلاص مشلولة
هب ف تونس شعب وقام
ردت مصر بكل رجولة
صحيت سوريا وفاق أبطالها
كسرت ليبيا قيود مغلولة
حتى يمنا طردت صالح
فردوا شراع وسيوف مسلولة
إوعوا تظنوا شعوبكم نايمة
إوعوا تظنوا الناس مذهولة
الحرية هتيجى يا وطني
والخفافيش هتبات مذلولة
أول خطوة لمجد وطنا
نجاح الثورة الخطوة الأولى