وجه الدكتور محمد علام نائب مدير مستشفى النجيلة للعزل بمحافظة مرسى مطروح، المصاب بفيروس كورونا المستجد "كوفيد 19"، الشكر لزملائه وأهله وجميع من حاول الاطمئنان على صحته، كما أوضح بعض المعلومات الهامة عن أعراض الإصابة بالفيروس التاجى، وتسلسل مراحل ظهور الأعراض وغيرها من المعلومات وفقًا لتجربته، والتى نشرها فى تدوينه عبر حسابه الشخصى على موقع "فيس بوك" لتوعية متابعيه وأصدقائه. وقال نائب مدير مستشفى النجيلة للعزل، فى تدوينته على "فيس بوك"، "أنا بخير.. لكل زمايلى وأهلى والناس اللى بعتولى وحاولوا يتصلوا بيا يطمنوا عليا اليومين اللى فاتوا بعتذر مكنتش قادر أرد عليكم"، وأضاف "ناس سألتنى عن الأعراض.. مبدئيًا الأعراض زى ماتكلمت من شهرين.. بتختلف من شخص لشخص مينفعش أقول أنا عندى كذا وكذا.. لأن استجابه جسمى مش زى جسمك، لكن هنعتمد على الدراسات اللى اتعملت على آلاف الحالات وشفناها فى الحالات اللى كانت عندنا.. وللأسف فى نفسنا".
وأضاف "أولا الأعراض، أشهرها ارتفاع بدرجة الحرارة ودى فى حوالى 80 ل90% من الحالات تستمر لأيام وممكن تختفى وترجع تانى.. تانى أشهر الأعراض سعال جاف فى حوالى 60% من الحالات.. وآخر حاجة ألم بالجسم وده فى حوالى 40 ل50% من الحالات.. يعنى ممكن الموضوع يبدء بكل الأعراض أو عرض واحد أو حتى بدون أعراض نهائى"، وتابع "بعد كده المرحلة الثانية ضيق بالتنفس وارتفاع فى معدل التنفس وده خلال أسبوع من بداية الأعراض أو أقل حسب مناعة الشخص.. وده بداية الالتهاب الرئوى ومش بيحصل لكل الحالات ولو محصلش فأنت خلاص بتخف، لكن لما بيحصل بيبدء يزيد بسرعة خلال يومين فقط بيكون التهاب رئوى شديد وبيحتاج لجلسات وأكسجين وتدخلات أخرى.. وبعد كده بيومين فشل بوظائف التنفس وبتصل للوفاة لو متحسنش".
وأوضح "ده تسلسل المرض طبقا لأخر تحديث للصين على عدد الحالات اللى عندها وكمان CDC وغيرهم.. فى إجماع على الأعراض دى باختلاف النسب بفروق طفيفة.. أى أعراض أخرى فهى نادرة جدًا وتكاد لا تحدث زى الاحتقان بالحلق والرشح واضطرابات المعدة".
ووجه الدكتور محمد علام، نصيحة، وقال "ثانيًا، امتى أروح اكشف؟؟.. لو بدأت ارتفاع درجة الحرارة وسعال أروح أكشف هيتعمل تحاليل وأشعة وبعض الأسئلة عن أماكن تواجدك أخر فترة واختلاطك بمرضى إيجابيين أو مشتبه فيهم أو دخولك مستشفيات.. لو حصل إن أى حاجة من دول تخلى الطبيب يشك هيتعملك مسحه لو لا فأنت مفيش عندك حاجة".
وتابع "وارد جدًا إنك فى أى مرحلة من دول تخف بدون أعراض أو بأعراض بسيطة أو بأعراض شديدة أو حتى فى مرحلة حرجة.. علشان كده المخالطين لحاله إيجابية بيتقالهم يقعدوا فى البيت لمدة 14 يوم لو مظهرش أعراض فأنت كده إما كان عندك المرض بدون أعراض نهائى وخفيت أو معندكش أصلًا.. إنما لو ظهر أعراض حتى لو بسيطة.. درجة حرارة أو سعال.. فأنت لازم يتعملك مسحه، لأن كده أنت مشتبه فيه مش مخالط".
وعن حالته، قال: "إنما أنا مريت بإيه.. فللأسف لأنى مدخن على بسيط والحمد لله بطلت لما تعبت.. فالأعراض كانت شديدة شوية وكان فى التهاب رئوى بس بدء يخف.. وحاليًا ارتفاع بدرجة الحرارة متوقع.. وبخف كلها أيام وابقى سلبى (التدخين مش بيحمى)"، وأضاف "مردتش اتصور قبل ما أعرف اضحك لأنكم عرفتونى متفائل مينفعش تشوفونى متشائم.. بيكم أنتم الوباء هينتهى والله بس ساعدوا بعض والتزموا بتعليمات وزارة الصحة ووعوا اللى مش فاهم". مستشفى النجيلة المركزى مستشفيات العزل الدكتور محمد علام كورونا مصر فيروس كورونا كورونا فى مصر كورونا اليوم اعداد المصابين بفيروس كورونا فى مصر اليوم اخر مستجدات كورونا فى مصر اليوم عدد حالات فيروس كورونا فى مصر شكل فيروس كورونا اخبار كورونا بمصر كم عدد حالات كورونا اليوم فى مصر كورونا ميتر اعراض فيروس كورونا اعراض كورونا 2020 كورونا نيوز الموضوعات المتعلقة فيديو.. تفاصيل أول أيام رمضان فى مطروح ومستشفى النجيلة للعزل السبت، 25 أبريل 2020 02:17 ص نائب مدير مستشفى النجيلة من الحجر الصحى: رمضان فرصة لتقليل انتشار كورونا الجمعة، 24 أبريل 2020 12:32 ص نائب مدير مستشفى النجيلة: "محدش طلب منى معلنش إصابتى بكورونا ومتحولتش للتحقيق" الأربعاء، 22 أبريل 2020 07:54 م نائب مدير مستشفى النجيلة: عدم الاختلاط أقوى سلاح لمواجهة كورونا الثلاثاء، 21 أبريل 2020 11:48 م مستشفى النجيلة تنفى شائعة وفاة أحد الأطقم الطبية بها الأحد، 19 أبريل 2020 01:41 ص 37 يوما بدون راحة فى مستشفى النجيلة.. الجيش الأبيض يواصل حربه ضد كورونا.. "إبرام": سافرت بعد ساعة من تكليفى وأمى قالت لى "فرصتك لخدمة بلدك جاتلك متتردش".."أحمد": زوجتى ممرضة ونفسى أشوف ولادى لكن شفاء المرضى أهم الأربعاء، 08 أبريل 2020 10:14 ص