دارى وشك

حط ستاره = صورك ماليه جرايد الحاره
كنت وزير وبتسرق بلدك = رشوه فساد وعاملها شطاره
كل كلامك كدب وباطل = حارق دمى فاقعلى مراره
ألفين قصر وألفين عزبه = بنك رصيدك يملا عماره
كل فاضيحك ماشيه تجلجل = صارت غنوه زى سماره
واحنا بنصرخ نشكى ونبكى = نلقى الخط مافهش حراره
كنت بتخنق صوت أحلامنا = وأى معارضه تضيع بإشاره
ناس فى العشه وجوا مدافن = حتى اللقمة واخدها تجاره
لحم حمير وطفح مجارى = تيجى تقوللى دا رمز حضاره
كنت توافق كنت تنافق = شغل أونطه لعب قذاره
غش خداع تزوير أصواتنا = وتحلف إنك أهل جداره
طالع نازل تنهش فينا = وكل جرايمك سبق صداره
ياما مصانع صبحت نار = وتقوللى الجانى فولت شراره
شفنا الضلمه بفضل ذكائك = حتى الشمس ماليها أماره
خليت ابن بلادك يشحت = مهدود حيل مش لاقى بصاره
ياما خصخصت وياما مصمصت = وعارف إنى الصفقه خساره
بس ضميرك مات جواك = ماشى مغرور بفن كباره
كنت بتمشى زى طاووس = وعينك حمره وفها جساره
خدت سنين العمر الحلوه = وكل فلوسنا راحت فى مغاره
سبت الشعب يعيش موجوع = مكر وغدرخبيث فى إداره
كل اللعب صبح مكشوف = طبله طار رق وزماره
جاى دلوقتى عامل مكسوف = خش السجن بألفين غاره
ادخل سجنك اجنى عمايلك = فلم حقيقى دا كله إثاره