محاكمة ديلفى؟؟

حاكموه ديلفرى وواحبسونا وطلعوه
وشوفوله قاضى يكون تبعهم وابعتوه
وشوفوله تهمه تكون أونطه وبرئوه
وشفولنا داهيه لشعب مصر وغوروه
مين اللى قاله يثور على اللى نغنغوه؟
مين اللى قاله يصحى للى بسرقوه؟؟
مين اللى صحاه فجأه بعد ما غيبوه؟؟
يا أهل مصر رئيس شريف وبتتهموه
وتقولوا إنه كان حرامى وتظلموه؟؟
وتقولوا كان يرأس عصابه تحت أمره بيخدموه
وتقولوا سرح جيش بلدنا بأمر م اللى بيسندوه
وتقولوا باع املاك بلدنا كأنها املاك ابوه
وتقولوا قتل من شبابنا اللى قاموا يرفضوه
وتقولوا لسه متخلعشى ولسه عاوزين تخلعوه
وهوه بيقول متخلقشى اللى يحاكمنى ألعن ابوه
متشوفوا صرفه فى اللى حاصل واعقلوه
إزاى رئيس وبحجم حسنى تعزلوه؟؟
وإزاى يجيلكم فى المحاكم وتشوفوه
يا شعب شمتان فى الرئيس وبتكرهوه
لسه وراه حرصه القديم وبيدعموه
الشعب من خير البلاد وبتحرموه
والمر فى كاس العذاب بتدوبوه
وتلفوا ميت مرة عليه وتشربوه
والحق لو بالكدب رافضين تنطقوه
والعدل حالفين ميت يمين ما تنفذوه
ما تقولوا إيه ينقذ بلدنا من اللى دايرين تعملوه
ما تقولوا ياللى بعتوا غازنا وبعتوا كل ما نملكوه
بعتوا الشرف فى بنوك أوروبا بالدولار بتحولوه
بعتوا الكرامة فى كل شبر تخصصوه أو تمنحوه
بعتونا أحنا للى يدفع تبعتونا نخدموه
مش عيب عليكم شعب مصر من الزباله تأكلوه
ومن المجارى تزرعو له خضار وفاكهه وتمرضوه
وتصدعونا بالحضارة سبعة آلاف عام بتهينوه
مش عيب عليكم أى عالم بره مصر ترحلوه
مش عيب عليكم لما طبال ترفعوه وتظبطوه
وتفصلوا القوانين عليكم توب مزور تلبسوه
وتورثوا كل الوظايف واللى جاى يورث أبوه
لو حد فكر يبدى رأييه وف وظيفه تنقلوه
لو حد يفكر يبنى طوبه قرار إزاله وتزيلوه
لو حد يعنى زى حلاتى كان بيحلم هتجيبوه
وتقولوا اسمه وسنه أيه الحلم عاوزين نعرفوه
تلاتين سنة والظلم عايش بين عيننا وبنشوفوه
تلاتين سنه بينهب بلدنا ولسه رافضين تسئلوه
عاوزينه سابق متخلعشى وفى المنهاج تكتبوه
عاوزينه يطلع مش حرامى وتعلو بيه وتكرموه
يبقى مفيش غير التاريخ شوفوا أن قدرتوا تزوروه
حاكمونا على كل اللى قلته واحبسونا وطلعوه
بس التاريخ شاهد عليكم مستحل هتسكتوه