رسائل السيسى خلال افتتاح مشروعات قومية: الدولة تبنى بالإرادة مع وجود الأمن والاستقرار.. ضخينا 800 مليار جنيه فى سيناء خلال السنوات الماضية.. وعالجنا مشاكل الطريق القديم فى جنوب سيناء بتكلفة 5.5 مليار جنيه

السيسى: بقولكم يا مصريين اللى اتعمل خلال أربع سنين اللى فاتوا ميتعملش خلال 20 سنة، وده مش كلام واللى عمل دا شركات مصر وكل المصريين العاملين فى المشاريع دى
الرئيس السيسى: هنفضل نفتتح المشاريع اللى عملناها عشان المصريين يعرفوا إن مؤسسات الدولة والمصريين بيبنوا علشان حياة المواطنين تتغير للأفضل
وجه الرئيس عبد الفتاح السيسي خلال افتتاح عددا من المشروعات التنموية فى السويس وجنوب سيناء، بإقامة نظم ميكنة متكاملة بغرفة التحكم فى جميع المجمعات الصناعية الجديدة.
واستفسر الرئيس السيسى عن التشوينات الموجودة داخل المصنع، قائلا: "قلنا ان مجمعات الرخام وأى منتجات تطلع تبقى ليها نظم ميكنة كاملة تبقى موجودة فى غرفة التحكم يوم بيوم بالمتر ايه اللى دخل المخازن سواء المخازن الرئيسية، وأنا بقول الكلام ده لو احنا عاوزين فى مصر نتحرك فى ان احنا نعمل حوكمة حقيقية ونجابه أى فساد يمكن يبقى متحقق مفيش قدامنا غير الميكنة ونظم المعلومات اللى تحييد اى خطأ مقصود أو غير مقصود".
وقال الرئيس عبد الفتاح السيسى، إن الطريق القديم فى جنوب سيناء كانت يتعرض لمشاكل عديدة بسبب الأمطار والسيول وكان يطلق عليه "طريق الموت"، موضحا أن الدولة أنفقت 5.5 مليار جنيه من أجل إقامة طريق جديد لتفادى كل الحوادث والسلبيات فى الطريق القديم.
وأضاف الرئيس السيسى، خلال المشاركة فى افتتاح عدد من المشروعات القومية الكبرى فى السويس، أنه تم إصلاح الطريق القديم بتكلفة مالية كبيرة والطريق كان مجرد حارتين فقط، وكل المشاكل الموجودة فى هذا الطريق تم السيطرة عليه، قائلا: "أى سيل فى المناطق الجبلية جنب الطريق لن تؤثر عليه.. وسوف يكون مصيرها تحت الطريق ببساطة".
وأشار السيسى، أن السبع محطات على الطريق ليست محطات رسوم فقط، ولكنها مناطق حماية وآمان.. حيث يوجد منطقة فى عيون موسى، ومنطقة أخرى فى شرم الشيخ، و5 محطات أخرى على مسافات بين 50 ل 70 كليو متر ويوجد بها قوات من الجيش والشرطة، وذلك فى إطار خطة الدولة للسيطرة على أرضها فى جنوب سيناء.
وقال السيسى، إن الخطة القومية للطرق والمجتمعات العمرانية كانت موجودة فى الدولة المصرية، قائلا: "دى خطة موجودة فى الدولة المصرية قبل ما نيجى.. الفكرة كلها إننا بنعملها.. الفكرة فى الإرادة مش التوجيه.. اللى قبل مننا عملوا شغل كتير وعملوا تخطيط كويس.. ولكن الأمور كانت محتاجة تتنفذ".
وتابع الرئيس السيسى خلال المشاركة فى افتتاح عدد من المشروعات القومية الكبرى فى السويس وجنوب سيناء: "دى دولة كانت بتشتغل ومخططة ومنظمة.. وإحنا قدرنا ناخد جزء ونطوره.. حتى المدن الجديدة".
وأوضح الرئيس السيسى: أن الدول لديها أجهزة تخطط لها من أجل البناء، والفكرة فى الفرصة.. والفرصة موجودة للمصريين ولكن الإرادة تصطدم بعدم الاستقرار.. متابعا، طول ما الأمور مستقرة نقدر نعمل اللى انت شيفينه ده.. وعشرات المرات.. النهادرة بيتقال إن مصر تقدمت 90 مركز فى الطرق.. هنتقدم أكثر مش بس فى الطرق.. فى التعليم والصحة والحوكمة ومكافحة الفساد.. جزء كبير من الموضوع ده إن مكنشى كله مرتبط بالاستقرار.. الاستقرار والأمن وفيه نوايا طيبة.. تقدر تترجم لعمل والدولة تتقدم ويكون لها فرصة وسط الأمم".
أكد الرئيس عبدالفتاح السيسي، أن الدولة ضخت استثمارات فى سيناء خلال السنوات الماضة وصلت إلى 800 مليار جنيه.
وقال الرئيس السيسي خلال افتتاح عدد من المشروعات التنموية فى السويس وسيناء اليوم الثلاثاء: "سيناء اللى كنا دايما بنتكلم عنها ومحدش إداها الاستثمارات الكافية، الدولة المصرية خلال السنوات اللى فاتت حطت استثمارات هائلة، والموضوع مش مرتبط بعدد السكان، ولكن مرتبط بأمن قومى مصرى و60 ألف كيلو متر مساحة سيناء، وبالتالى مكنش ممكن نستمر فى إن إحنا ما نقومش كدولة بالمطلوب مننا، وحطينا استثمارات ب 800 مليار جنيه شاملة محطات التحلية والطرق والأنفاق والمناطق الصناعية، والمساكن.
طالب الرئيس عبد الفتاح السيسى، بسرعة البدء فى تنفيذ مدينة السويس الجديدة، وذلك ردا على حديث وزير الإسكان الذى أعلن البدء فى تنفيذ المدينة بداية من شهر يوليو المقبل، مع بدء العام المالى الجديد وفق موازنة المجتمعات العمرانية الجديدة بعد انتهاء أعمال المخططات.
وقال الرئيس السيسى لوزير الإسكان: "هو احنا بناخد فلوس المدن الجديدة من الموازنة العامة؟"، ليؤكد وزير الإسكان أن هيئة المجتمعات العمرانية لها موازنة خاصة تنفق منها.. وموازنة المجتمعات العمرانية من العام الجديد مخصص فيها تنفيذ مدينة السويس الجديدة"، ليقاطعه الرئيس السيسى: "كده هنكون متأخرين.. ولو بدأنا فى شهر يوليو المقبل.. هنأخد سنتين لحد 2020 حتى يتم الانتهاء من المرحلة الأولى".
جدد الرئيس عبد الفتاح السيسي استعداده الكامل لافتتاح المزيد من المشروعات بشكل يومى، محذرًا فى الوقت نفسه من تشويه الإنجازات عبر الشائعات التى انتشرت خلال الشهور الماضية.
وقال الرئيس السيسي خلال افتتاح عدد من المشروعات التنموية بالسويس وجنوب سيناء اليوم الثلاثاء: "توقفنا خلال الفترة اللى فاتت عن الافتتاحات وبقول أنا مستعد يوم بعد يوم لمدة شهر أو اثنين أو ثلاثة نفضل نفتتح اللى عملناه علشان نوريه للمصريين مش احنا اللى عملناه ده احنا كلنا كدولة ومصريين اللى عملت علشان تغير حياة المصريين وبقول الكلام ده وبكرره علشان محتاجين نتكلم كتير ونكرر الكلام كتير والإعلام يتحدث كتير علشان يقول للناس يا مصريين متخلوش حد أبدا يخدعكم، مستشهدا بالآية الكريمة "فسحروا أعين الناس".." سورة الأعراف".
وتابع الرئيس السيسي قائلا: "يعنى إيه سحروا أعين الناس؟، يعنى خدعوهم بيضحكوا عليهم ويشوهوا الحكاية، وده أمر احنا مسؤولين مع بعض كلنا الدولة بمؤسساتها وإعلامها إنها تبقى الحامى المدافع عن وعى المصريين علشان أنا ملاحظ إن بقالنا شهور يحاولوا كل يوم ألف وألفين يعنى شائعة وتكذيب وتحريف وإفك فالناس معذورة برضه والناس بسيطة ومشغولة فى أكل عيشها وفى حياتها اليومية ومش هيقعد يدقق فى كل اللى احنا بنتكلم عليه ده، محتاجين إن إحنا نكرره ونتكلم فيه، وكل مسؤول بيفتتح مؤتمر لازم يعدى على حتة الوعى ويتكلم فيها، هل الناس هتزهق ؟..لأ مش هتزهق، الناس عاوزة تبقى دايما مطمنة وتعرف".
ووجه الرئيس السيسي حديثه للمصريين قائلا: "بقولكم يا مصريين اللى اتعمل خلال أربع سنين اللى فاتوا ميتعملش خلال 20 سنة، وده مش كلام واللى عمله شركات مصر وكل المصريين العاملين فى المشاريع دى، احنا بنتكلم فى 4 أو 5 مليون قولولى لو مكنش الشغل ده بيتعمل الناس دى كنت هتعيش منين، رجع من ليبيا 1.5 مليون يشتغلوا فين يأكلوا منين؟، لكن النهاردة بنقول هنفضل نشتغل كده على طول ونشتغل لحد 2052 نبنى ونعمر ونصلح علشان الناس تعيش".
وجدد الرئيس عبد الفتاح السيسي، التأكيد على أهمية مشاركة القطاع الخاص فى الخطط التنموية للدولة، مشيرا إلى وجود العديد من الصناعات الواعدة شريطة توافر الإرادة اللازمة لذلك.
وقال الرئيس خلال افتتاح عدد من المشروعات التنموية فى السويس وجنوب سيناء اليوم الثلاثاء: "جزء كبير جدا من مكونات محطات التحلية احنا بنجيبه من الخارج بقول للقطاع الخاص ان فيه صناعات كتيرة جدا عندها فى مصر وعندكم ليها فرصة لو خدتوا الإرادة..مش هقول اعمل كل المكونات ولكن اعمل جزء من المكونات دى لان الموضوع ده هايبقى معانا، وفيما يخص الميه والطلب اللى عليها حتى فى حصتنا الموجودين فيها بنتكلم فى 500 متر للمواطن فى السنة وده بيعتبر فقر مائى، وكدا او كده هانتوسع فى محطات التحلية والصناعات دى لو موجودة فى مصر هيبقى عندها فرصة لتلبية السوق المصرى وكمان المحطات بيتعملها صيانة وقطع غيار، فيه كتير والقطاع اللى محتاج مننا كلنا دولة ومواطنين وقطاع خاص ومستثمرين وبنوك هو الصناعة ده اللى لسه مخدش فرصته اللى احنا بنتمناها لان ده بيدى فرص عمل مستقرة لعدد كبير من المواطنين".