إضراب شباب الأطباء

شعرى واقع والنظر يدوب بشوف
متزوج فى البطاقة بس عازب للظروف
كل كام يوم أما أروح..
أتخمد على طول وأنام
زيى زى أجدع (..........)
ع العلام ضيعت عمرى
لأجل أضيف الدال لإسمى دوقت مرى
والعجاف السبعه مروا..
وأما جيت أشرب قالولى لسه بدرى
ع البرايفت قبل ما أبدا إمتياز
قبل ما أعرف إيه حقيقى وإيه مجاز
وإيه يُعالج وإيه يُحول وإيه شروط الإحتجاز
وأما كان يسألنى ليه؟!
كنت أرد بإعتزاز
فى البرايفت يا صديقى
اليوم يساوى نص شهر من مرتب الإمتياز
وأما قامت ثورة توهت
المبادئ لا تُجزأ
واللى ثار بنفسه يبدأ
"مش هسيب الشغل وأجرى ع البرايفت"
هو كام يوم والتقتنى بأستلف حق الفطور
والشيطان نازل يزن
وأنا أقوله روح يابن ال(..........)غووووور
والليالى تمر مُر
وكل كام يوم أما يجى سيادته يحضر المرور
الحكومه للغلابه اللى زيى
واللى زيه العياده طابور طابور
اللى زيى حقه يضرب
واللى زيه حقه يكره أى قلب جسور يثور
جدول الأيام وسطر
لسه بدرى عليك يا ماستر
العيال السيس بتوع الأنتخه
واللى ما ذكروش ولا كلمه ف حياتهم...
طلعو أشطر
البلد دى مش بتاعة اللى فكر
البلد دى للى شاط واللى رقص وسطه واللى ...
واللى بلسانه السياسى كل يوم يطلع يبرر
البلد دى مش بلاد الأهرامات؟!
ليه هرمها الوظيفى مقلوب مكسر
البلد دى فيها ثوره
واللى مش قابل يِغير سَيُغير
فى الموازنه السنويه
الصحه واخده تلاته الميه
والنصب كان تسعين فى الميه
والباقى للخطط الأمنيه
(شعب ملهى ف صحته
عمره ما يقول كلمته)
هيا دى كانت سياسته وحكمته
أما إيه سياسة سعادتك؟!
الطبيب عاجب سعادتك؟!
والمريض باسط سيادتك؟!
والدموع فى عيون ثكالى
هو دا سر سعادتك؟!
لو سمحت وبعد إذنك
البلد دى فيها ثورة ....
وإنت إيه مقعد سعادتك؟!
إللى أجر ناقه يقتل شعبه بيها
عيب يكون واخد مكانتك!!!!
من مكانا نقول عشانهم
إللى منا وإحنا منهم
صحتك هيا الأمانة
وإحنا حافظين الأمانة
إحنا إضرابنا هيضرب
كل خاين للأمانة