توقيع "الكتاب الثانى" لأحمد العسيلى بمكتبة الشروق

تقيم مكتبة الشروق بالزمالك حفل توقيع لكتاب "الكتاب الثانى" للكاتب أحمد العسيلى الصادر عن دار الشروق، وذلك فى السابعة مساء الجمعة القادم.
كتب العسيلى على ظهر غلاف الكتاب كلمة قال فيها:
الحياة قد يراها البنى آدم على إنّها امتحان، وهى غالبًا كده فعلًا، بس هى مش كده وبس.. أمّال هى إيه؟ لعبة طبعًا!
يعنى زى ما تقولوا كِده امتحان بس فى صورة لِعبَة.. لعبة معقّده جدا بس ممكن تخلّيها بسيطة لو عايز، لو تقدر..
مطلوب منّك تلعب اللعبة بالقواعد اللى تشوفها مناسبة، ماحدّش فعلا بيجبرك على حاجة.. بس سر النجاح الحقيقى فى اللعبة دى هو انّك انت اللى تلْعَبها ماتخلِّيهاش هى اللى تلْعَبَك (وماتخلّيش حَد يلعَب مكانَك!).. اللعبة دى مش عن المكسب والخسارة (أو على الأقل مش هنا)، ماتنساش نَفسَك لما تكسب وماتاخدش الموضوع جَد زيادة لمّا تخسر.. ماتستنّاش حاجة، كل حاجة بتيجى فى وقتها.. ماتعملش أبدًا حاجة انت مش موافق عليها، ولمّا تعمل اللى انت وافقت عليه ماتندَمْش.. اتعلِّم من لِعْبَك، ماتِعملش نفس الغلطات تانى، وبينى وبينكو لو عَمَلتها لكن برضُه اتعلّمت ماحَصَلش مأساة يعني؛ انت بنى آدم وبتغلط، ماتزوّدهاش بس!
لمّا اللعبة تخلَص فيه شويّة حاجات قليّلة مهمّة فعلًا، والباقى كُلّه من وجهة نظرى مش مهم:
- أنت اللى لعبت فعلا ولا لأ.
- لعبت بشَرَف ورجولة واحترام لنفسك وللعبة ولا لأ.
- اللى لعبوا معاك حَبّوك ولّا لأ.
- الحَكَم حَبّك ولّا لأ.
أتمنّالكو لِخاطِرى قراءة مُلهِمَة ومُمْتِعة