هدوء يلا نبنى مصر

"انتم عايزين شعب جديد عشان يحقق أحلامكم" عبارة قالها واحد من النظام البائد بحجة أن عسكرى المرور أو أمين الشرطة اللى كان بيسيب العربيات تركن فى الممنوع مقابل جنيه أو حتى خمسه لحسابه.. ازاى حيصبر لغاية ما يتحسن وضعه وازاى البلد حتنهض وترجع أحسن من الأول والاعتصامات فى كل مكان من مستشفيات وبنوك ومصانع.
عارفين الثورة نجحت ليه؟ عشان الشباب مكنش ليهم مطالب شخصية أو فئوية وكانوا صوتا واحدا ونداء مشتركا "الشعب يريد إسقاط النظام" بكل عفنه وفساده.. يعنى كان فيه تعاون وإنكار للذات.
طب هل هدف الثورة إن الناس اللى معندهاش سكن تستولى على شقق غيرها، طيب ما الشقق دى ملك لحد تعب وشقى علشان يشتريها يعنى الغلبان مايجيش إلا على الغلبان اللى زيه.
صحيح العدالة الاجتماعية مطلوبة وكان فيه كوسة فى توزيع بعض الشقق اللى مفروض اللى محتاجين بجد بقواعد واضحة وعلانية ومن غير واسطة.
شوف ياصاحبى لما أقولك الكل متفائل بمستقبل أفضل ومشرق، بعض الشباب بعد نجاح الثورة استبشر خيرا وقال"الامور ستكون أفضل ", وآخر قال "سأشتغل" وثالث "أخيراً سأتزوج" وقالت فتاة ضاحكة "لا عنوسة بعد اليوم" يعنى الطموحات والأمل كبير ولكن نهدأ الأول ونصبر شوية وبلاش بقى المطالب الشخصية ونضع قواعد مكتوبة تمنع الفساد وتعظم قدرتنا ونستثمر الكفاءات الكتيرة اللى عندنا ونؤهل الباقين.
لازم الناس تفهم إن الثورة يعنى مش الكل هيحصل على حقه بالسرعة دى، اللى عاوز حياة كريمة وأحسن لازم يشتغل علشان يجيبها مش هتجيله من السماء والا حيفضل مفيش استقرار والدنيا هتخرب، لأن احنا كدة بعد النجاح حنرجع لورا، لازم نوعى الناس أن يصبروا علشان نخطط للعيشة الجديدة اللى احنا عاوزينها ويعرف العالم كله قدرتنا ونوفر المناخ الصحى الصح لكل المواهب والكفاءات.
شوف ياصاحبى لما أقولك دلوقت بلدنا محتاجة الوعى، محتاجة نخاف عليها قوى، يالا بينا نبنى مصر بطريقة حلوة والصورة اللى أخذت علينا إن احنا شعب متحضر منخربهاش بايدينا أهم إنجاز حققناه دلوقتى ان صورتنا اتغيرت فى عيون العالم كله و ده مش كلام انشاء.
الدليل إن الرئيس الأمريكى أوباما قال: يجب أن نربى أبناءنا ليصبحوا كشباب مصر, ورئيس وزراء إيطاليا: لا جديد فى مصر فقد صنع المصريون التاريخ كالعادة .كمان ستولتنبرج رئيس وزراء النرويج صرخ قائلا: اليوم كلنا مصريين.
وهاينز فيشر رئيس النمسا: شعب مصر أعظم شعوب الأرض ويستحق جائزة نوبل للسلام عارفين ليه؟ عشان مكنش فيه أى تجاوزات ضد الممتلكات العامة أو العمل على تخريبها؛ واختفت التصرفات الصبيانية التى كانت تتم قبل الثورة رغم حالة الاختلاط التى عاشها المحتجون. انطلقت المبادرات وتفتحت الزهور والمواهب والأفكار الجميلة منها فكرة تجميع مبالغ مالية لمساعدة أهالى الشهداء عارفين شبكة ال CNN قالت إيه؟.
لأول مرة نرى شعبا يقوم بثورة ثم ينظف الشوارع بعدها، الجميل والممتع أن الشباب ابتكر فكرة تنظيف مصر كلها مش ميدان التحرير وبس، إنها حالة من التضامن الاجتماعى والإحساس بالمسئولية، برضه لا يمكن لأحد أن ينسى الموقف البطولى فى الحفاظ على الأمن عندما تخلت الأجهزة الأمنية عن مهمتها بفعل فاعل، تعالوا بقى ننمى ونحافظ وننشر هذه الروح وهذا التوهج حتى ننظف البلد مش من الزبالة وبس وإنما من الفساد والتسيب، عارفين الشباب والشيوخ وحتى الأطفال بيوزع الآن منشورات وهى أجمل حاجة قرأتها بعنوان "دعوة للتغيير-هنتغير احنا الأول" بتقول إيه؟
مش هادفع رشاوى وإكراميات فى المرور والقسم والمصالح الحكومية، مش هاعاكس بنات ولا حتى أغلس عليهم، مش هامشى عكسى ولا أجرى بسرعة بالعربية، هاحترم الإشارة حتى لو مافيش عسكرى واقف، هاطلب من الضابط يكلم معايا باحترام كمواطن له حقوقه، ها طلع على القوانين وأعرف حقوقى، ها حاول أنمى الشارع اللى أنا ساكن فيه، ها بلغ جهاز حماية المستهلك لما ألاقى حد بيبيع غالى، مش هاكون سلبى وهأقول لأى حد بيعمل غلط انت غلطان، هاقدم بلاغ ضد أى تعديات لرجال الشرطة والمرور وضد أى جهة مش شايفة شغلها صح .لازم نعامل بعض باحترام ونطلب نتعامل احنا كمان باحترام، هافتخر ببلدى قدام الأجانب وأدافع عنها، هاساعد الناس اللى محتاجين فعلا، هعرف حقوقى وواجباتى القانونية، الكلام ده مفروض ننشره وننفذه لأن دى بقى البداية الحقيقية لنبنى مصر الجديدة حتى يحس كل واحد مناان البلد بلدنا وثورتنا مستمرة حتى يحصل كل مظلوم على حقه.