بهية أم طرحة وجلابية

يحكى فى سالف العصر والزمان.. أنه كانت هناك شابة اسمها بهية.. ذكية عفية طموحة فتية طيعة ندية.. وأهل بهية كانوا أناس مسالمين طيبين.. من الشمال لليمين سامعين الكلام ومؤدبين.. قالوا لبهية وأهلها هنبتدى بيكم مسيرة.. قالوا ياله على بركة الله سيروا.. وكانت مسيرة حكاية مفيدة للسامعين معنى..
بداية مسيرة...
أولها كانت شركات توظيف أموال.. وعند الحكومة سمعتها عال العال.. عليها سكان المغارة رايحين جايين.. والمدح والشكر فيها صلاة الزين.. وفى ليله قالوا دول عالم نصابين.. وفلوس عبد المعين وبهانه وحسين.. ضاعت اختفت فى غمضة عين.. والعالم تصرخ فين فلوسنا يا جدعان.. قالوا مالناش دعوة ده شعب غفلان.. ويقولك ماتخفوش شقاكم فى أمان.. خد باللى بقى منها مكرونة وسكر ولبان.. وحال ناس كانت مستورة بقى عدمان.. والنهيبة اتنهبت من دم المساكين.. وكشوف البركة اختفت فى مكان أمين.. ما يعرف سره ولا صريخ أبن يومين.. واللى مالوش حظ يشتريه منين..!!
وبعدين ...
قالوا هنعمر أرض الفيروز وأديها عمرانة.. وبدل ما يكون فيها عشرة عشرين مليون.. يكونوا شوكة فى ظهر أى معتدى خسيس ملعون.. عمرت فنادق وقرى سياحية.. ومع أول صاروخ كله هيخلع المايوه.. ويجرى كما ولدته الوالدة.. وعلى بلده يشحنوه علاوله.. ما تلاقى فيها ولا نسمة طايرة.. تبقى فى تراب أرضها الطاهرة.. مطرح ما رب العباد كلم عبد الله..
وقبلين ...
قالوا العلاج مكفول لكل عليل عيان.. تعبت بهية راحت مستشفى الشعب الغلبان.. جه طبيب وقال الهمه يا فندية.. عايزين سرنجات وأدويه مهمة.. رجعوا يلفوا ويدوروا ولقوها.. لقوها بتناجى ربها ضحيه مرمية.. يا رب ليه الغلبان مالهوش ديه.. يا رب ليه الفقير كرامته منسيه.. أدى أخرة اللى يروح مستشفى حكوميه..!!
وأتمطعوا...
قالولها توشكه هتزرع الأمل فيكى.. وتبقى الحلم اللى يغذيكى.. كان الحلم سحابة صيف معديه.. وفى يوم راحت كما جمره مطفية.. قالت وديتوا الحلم فين يا رجاله.. قالوا إمتى كانت أحلامك واقعية.. أمتى وعدناكى وحققنا حاجه حقيقية..!! واتنطعوا ...
قالولها هتشوفى نهضه صناعية.. وما صنعوا حتى ولا إبرة مصدية.. ولامتور غسالة أو فسبة هوائية.. شعوب الأرض مكشوفة قدام عينيها.. بصت على أخوانها فى كوريا وماليزيا.. حتى الهندى أتفوق عليها.. من قرن وزيادة انفتحت جامعات بلادها.. سألت العلم راح فين يا جدعان.. قالولها فى بلادك لايكيل بالبدنجان..!!
نهاية مسيرة...
كفاية عليها الرقص والطبل والزمر والكورة.. راية بلادها هتبقى بيهم منصورة.. راح فين ضمير بلدها والهمة.. راحت يوم ما بقت الأخلاق منسية.. وزمان قالها واحد ذمته صاحية.. الأمم لو راحت أخلاقها ذاهبة.. وإحنا فى زمن الكدب رايته منصوبة.. وبترفف وعاليه لناس كتير واكلينها والعة..!!
الواسطة بقت ميثاق حياتها.. ومن غيرها مالها مستقبل ولا لعيالها.. شوارع مكسرة تحت رجليها.. والتراب داخل جوه عنيها.. والعشوائية بقت مفروضة عليها..!!؟
وشوشت بهية الودع ولكن ما ردش عليها.. وصرخت ومافيش إلا صدى صوتها رجع إليها .
إلى أهل بهية...
يا ولاد الحلال تايهة.. بهية واقفة محتارة.. خايفة وبتترعش منهارة..
يوم لا ينفع بهية الندم.. من مصير اسمه العدم.. مستنى ناس غافلين..
بايعيين سلبيين مستسلمين.. الستر يا أهل الدين.. هيسألنا رب العالمين..
بهيه هترجع عزيزة بعد الانهيار..
ونيلها هيرجع من أعظم الأنهار..
تقول أنا بهية يحق لها الفخار..