النحافة جابت له الكلام.. فقرر يبقى بطل كمال أجسام

ملابس سوداء وماسك من اللون ذاته يشكلان الزى الرسمى لهشام ثابت الضابط العشرينى الذى يتطلب عمله أن يظهر بشكل صارم وجاد يتناقض ربما مع مشهده فى عالمه الآخر بين أبطال كمال الأجسام واقفًا ب"شورت" ملون على مسرح مسلطة عليه الأضواء أثناء تقديم واحد من عروض لعبته، وبين المشهدين 6 سنوات من الإصرار والتدريب القاسِ لينجح فى التحول من مجرد شاب نحيف وزنه 65 كيلوجرامًا بينما طوله 189 سنتيمترًا إلى واحد من أبطال كمال الأجسام بوزن 110 كيلو جرامات.
بدأ هشام حكايته مع لعبة كمال الأجسام بالصدفة ويحكى عنها ل"اليوم السابع": "من وأنا صغير لحد ما دخلت كلية الشرطة وانا رفيع أوى، وكانت الناس بتتريق على شكلي، ورغم كده كنت بحب المصارعة وكمال الأجسام ونفسى أبقى زى الناس اللى بشوفهم فى التلفزيون دول، لكن كنت كل ما أقول كدة لحد من أصحابى أو قرايبى كانوا بيحبطونى جداً، ورغم كدة قلت انا هنزل الجيم وهعمل اللى انا عاوزه، وفعلا بدأت أنزل كتير حتى فى اجازتى من الكلية، وصاحبى كان بيدرب كمال أجسام شافنى وقاللى جسمك كويس جداً لازم تلعب وتدخل بطولة ودى كانت العلامة اللى فى حياتى".
من شخص هاوى إلى محترف نقلة كبيرة يحكى عنها "هشام": "انا خفت جداً لما صاحبى قال لى الفكرة، لكن فى نفس الوقت كنت فرحان، بس فضلت أسمع تريقة الناس عليا وإنى هفضل أروح الجيم وبرضه مش هتخن، ولما جسمى بدأ يبان عليه إنى بلعب بقيت ألبس هدوم كتير عشان محدش يفهم انا بعمل ايه، وحتى والدتى وخطيبتى ماكانوش يعرفوا عنى حاجة"، وأضاف "بدأت أجهز للبطولة وده بيحتاج منى إنى أفضل 3 شهور باكل أكل دايت بس، وبشرب مية مقطرة وقبلها بيوم مش بشرب مية خالص، وقلت انا لازم أثبت نفسى لأن صحابى كلهم كانوا مش مصدقين إنى هعمل أى حاجة، وفعلاً طلعت على المسرح وقدمت عرض حلو جداً ماكانوش الناس مصدقين إن ده واحد عمره ما طلع على مسرح، ووالدتى وخطيبتى اتفاجئوا بشكل وبجسمى وكنت فخور جداً بتعبى وفرحت إنى حققت حاجة فى حياتى بعد ظروف كتير مرت عليا، لأن اللعب ده انا طلعت فيه حزنى على وفاة أبويا وإحراجى وكسفتى اللى عشت بيها طول حياتى والناس اللى بتسخر من رفعى".
ويستكمل هشام حديثه عن حلمه فى لقب بطل العالم لكمال الأجسام ويقول "كان ليا صاحب قال لى جملة عمرى ما بنساها لو طلعت على المسرح تانى مش هتقدر تسيبه، وفعلا لما حققت مركز كويس فى البطولة أول مرة، قلت انا لازم أكمل وحالياً انا مشترك فى بطولة مصر لكمال الأجسام، وبطولة روسيا، وحالياً باخد معايا أدواتى اللى هى عبارة عن حبل مقاومة وأكلى الخاص فى الشغل وبفضل أتدرب عشان أجهز، والحمد لله إن الناس فى شغلى بيدعمونى جداً".
موضوعات متعلقة..
- البطل العالمى أرنولد يكرم المصرى عادل فهيم فى بطولة جنوب أفريقيا لكمال الأجسام
- من أول يناير خلاص هشيل حديد..شعبان عبد الرحيم ينفذ وعده ويتدرب فى ال"جيم"