شعبان عبد الرحيم ل"خالد صلاح": أقلعت عن المخدرات وأولادى"بيشربوها" ويجب بيعها بالمحلات.. المطرب الشعبى: "نص المساجين حبايبى وبخاف أقول سلام عليكم".. و"السيسى شغال كويس لكن المشكلة فى اللى حواليه"

علق المطرب الشعبى شعبان عبدالرحيم، على الأحداث التى تمر بها مصر، قائلا: "يا رب الدنيا تهدا وتعدى على خير، كل يوم فى وش وقلق، وناس عندها وش، والبلد هتستقر بإذن الناس تخلص لبعض، وكل واحد يشتغل بما يرضى الله، والناس دلوقتى بتدور على مصلحتها سواء كبير أو صغير".
وحول زيادة الأسعار، أكد شعبان عبدالرحيم، خلال لقاء خاص ببرنامج "على هوى مصر"، الذى يقدمه الكاتب الصحفى خالد صلاح ويذاع على قناة النهار، بمناسبة عيد الربيع وشم النسيم، "أنا مش عايز أجى فى صف الحكومة الناس تزعل والعكس، وعشان كدة مش هتكلم فيها، خلينى فى البدلة بتاعتى أنا بجيب القماش والترزى بتاعى يبفصلى البدلة، وبلعب جيم دلوقتى جنب البيت ومتخنتش".
وتابع: "كنت تعبان، وبطلت سجاير من أكثر من سنة، وساعة أغنية هبطل السجاير كنت بلف سجاير ومش سجاير عادية، وبعد ما روحت المستشفى لو حد شرب سجاير جنبى بضايق لأنى مش بشربها، وعايز أشربها".
وحول لون بدلته، علق المطرب الشعبى قائًلا:"البدلة ماشية مع البيض الملون"، فيما اعترف المطرب الشعبى، بأن أولاده يتعاطون المخدرات، لافتاً إلى أنه ابتعد عن تناولها منذ 6 سنوات، بعد تدهور حالته الصحية.
وقال "عبد الرحيم"، "بقالى 6 سنين مبطل كل حاجة وبوعى فى الشباب ومفيش فايدة، وفى ناس بطلت وبتتصل بيا وتقولى بطلت مخدرات وسجاير"، وقال مازحاً:"خدر ولطف..العالم والدنيا كلها بتشرب ".
وتابع:" أنا بطلت لأنى تعبت وكمان لأنها حرام، وكنت عارف أنها حرام وبخسر فلوس"، مضيفاً :"ولادى بيشربوا ساعات مخدرات والواد اللى بيمشى مع أبنى بيشرب مخدرات، وكلهم بيشربوا، والدنيا كلها بتشرب وبخاف على ولادى سواء عدوية أو عصام".
وطالب شعبان عبد الرحيم، الدولة بتقنين بيع الحشيش والمخدرات فى محلات البقالة، إذا أرادت منعه من الأسواق ، بجانب منح كل مواطن "صباع حشيش"، والقبض على من يكون بحوزته أكثر من تلك الكمية، موضحا أن "الممنوع مرغوب".
وأوضح، أنه "لو سمحنا ببيع المخدرات، ممكن ناس كتير متروحش تشترى، والناس هتبطل لأنها بتجرى ورا الحاجة المستخبية".
و علق المطرب الشعبى، على اتهامه بازدراء الأديان، قائلا:" بخاف أقول لحد سلام عليكم، ليعملولى محضر، وبصلى فى البيت ومبقولش لحد إنى بصلى"، مضيفا:"مفيش واحد عملت له أغنية وسقط فى انتخابات البرلمان، إلا شخص واحد بس لم يعطينى حق الأغنية"، مشيرًا إلى أن أغلب أغانيه مجاملة.
وكشف أنه غنى أغنية للعاهل السعودى، الملك سلمان بن عبد العزيز، لكنه لم يعرضها بعد الأحداث التى شهدتها مصر بشأن جزيرتى تيران وصنافير، خوفا من اتهامه بالنفاق والتطبيل، مضيفاً :"معرفش حاجة عن السياسة وماليش دعوة بيها..وأغنى بناء على الحدث..والسياسة بحرها واسع".
وقال "عبد الرحيم"، "أنا مش بطبل ولا أنافق حد، وأتعامل بأمانة الله..الملك خدم مصر وعلينا أن نرحب به، ونقوله كلمتين كويسين، والمسئولين أكدوا أن الجزيرتين ملك للسعودية ".
وأشار إلى أنه غنى للرئيس عبد الفتاح السيىسى عدة أغانى أبرزها "كلنا بنحب السيسى"، مضيفاً :" لا أنافق الرئيس وبغنى لأى حد شغال كويس، عشان أشجعه..والسيسى شغال كويس لكن اللى حواليه ليسوا بنفس الدرجة".
وأشعل المطرب الشعبى شعبان عبد الرحيم، ستوديو برنامج "على هوى مصر" بغنائه المقطع الثالث من أغنية "أنا فى انتظارك" لكوكب الشرق أم كلثوم، وأكد أنه يغنى لأم كلثوم فى الأغانى الشعبية منذ زمن، كما أنه يعشق الأغانى القديمة.
وفى سياق آخر، شدد شعبان عبد الرحيم، على ضرورة إجراء حملات توعية من خلال الأغانى بالتنسيق مع وزارة التضامن، مضيفاً: "أعمل على توعية المواطنين من خلال الأغانى الشعبية، وأذهب للسجون، ونص المساجين صحابى وحبايبى وبنعمل للمستقبل، مستعد لعمل أى حملات توعية فى محافظات مصر".
وتعليقاً على ظهور فرق المهرجانات الشعبية، قال: "أولاد سليم اللبانين الناس بتاكل عيش..أرزاق ربنا بيقسمها"، مضيفا:"من أول أوكا وأورتيجا وشحته العملية هاصت..احنا أخدنا وقتنا ووصلنا لمرحلة مفيش أعلى منها، وكل واحد ياخدله يومين، وهذا حال الدنيا".
وأعرب "عبد الرحيم" عن عشقه للفنان الراحل محمد عبد المطلب، وأم كلثوم، وسماعه لأغنياتهم، بجانب بعض المطربين الجدد مثل جورج سوف، مختتماً حواره بغناء "مبيسألش عليا أبداً ل"عبد المطلب".