مش أى رياضة = حافز الثانوية.. لا مؤاخذة

إيه رأيكم فى الحكم الذى صدر من القضاء الإدارى حول البطولات المحلية التى يجب ضمها لحافز الثانوية العامة؟!
طيب.. ريه رأيكم فى إن المدارس.. وتحديداً أبلة النظرة.. ومستر كذا مدير المدرسة.. بيلغوا حصة الرياضة فى المدرسة اللى هى بلا «حوش» أصلاً.. من نصف السنة الثانى؟!
آه.. ده على أساس إن نص السنة الأولانى كان فيه أصلاً رياضة يا أفندم؟!
يا سادة.. فى مصر.. عايز أقول لحضراتكم إن الحافز الرياضى.. لا يمكن فقط أن يكون لأصحاب البطولات العالمية.. لأنها تبدأ من البطولات المحلية، مروراً بالبطولات القارية!
المطلوب الآن.. هو بحث جديد.. عنرانه.. «إيه هو الحافز.. ولمين»!
الطبيعى ألا يكون لرياضات تم إضافتها لمناهج الرياضة المصرية حتى تقام لها بطولات وهمية مدرسية من المنطقة التعليمية، ليفوز «الحبايب» بالحافز.. أى مكان فى قائمة «التفوق» من الأساس!
يا سادة.. فى مصر لو حضراتكم موافقين.. يبقى فوراً.. نرفع للسيد وزير الشباب.. إيوه «الشباب».. والرياضة معروضاً مهماً.. بتوقيع الشعب الحقيقى!
آه.. الشعب الحقيقى.. زى الحب الحقيقى كده!
يعنى الناس اللى بتجرى بأولادها من المدرسة.. إلى الملاعب «رايح - جاى»!
هؤلاء فقط يستحق أولادهم الحافز مع النتائج!
صدقونى.. ربما نضيف ولو.. %1 لأنهم كمان بيجيبوا بطولات رغم أنف أبلة الناظرة.. ومستر كذا المدير.. اللى مش معترفين بالرياضة أصلاً؟!
يا سادة.. فى مصر.. المطلوب الآن.هو أن يصبح الحافز الرياضى مرتبطا بالبطولات المحسوبة على الرياضات الأولمبية وكيف أن أبطالها حين يفوزون محلياً.. بالتالى يلعبون بطولات عالمية.. وفى الوسط.. بيكونوا لعبوا وتنافسوا «قارياً».. يعنى «ضرب الأرقام القارية واجب قومى للحافز».. مش كده.. والنبى يا اخوانا!
يمكن أيضاً وضع الرياضيات الأولمبية فى جدول، وإعلانه بشفافية.. مع ضمان عدم اللجوء للمحاكم لإضافة بطولة هنا.. أو أخرى هناك.. على المزاج؟!
يا سادة.. فى مصر.. أرجو.. الاهتمام جيداً.. برفع كل الشكاوى الناتجة عن عدم وجود «حوش» بالمدارس على الأقل للإعلام صوتاً وصورة!
طيب.. علشان ماحدش يزايد على اللى خلفونا، ويقول مدارس الحكومة مسكينة وغلبانة.. نعمل إيه؟!
بسيطة.. المصريين بيدفعوا دم قلبهم مصاريف لأولادهم فى مدارس خاصة.. ماشى؟!
مش عارف.. ولا فاهم.. ليه مافيش شكاوى من كون هذه المدارس صاحبة المصاريف العالية.. بدون ملاعب!
يا سادة.. فى مصر.. ده مش بس بدون ملاعب.. كمان بدون مدربين مهرة!
آى والله كده.. وبدون ما أى حد يزعل مننا.. مدرس الألعاب وحده.. لا يكفى.. إنما وجوده، وإعداده مهم جداً.. يعنى إيه؟!
يعنى لازم يتم تأهيله.. ثم تدريبه.. ثم دخوله دورات للحصول على تراخيص تدريب.. فيها حاجة دى؟!
يا حضرات.. كاشفوا أنفسكم بالحقائق.. ولا تخشوا، إلا وجه الوطن، والله من قبل الكل!
يا سادة.. فى مصر.. لابد من وضع صيغ شعبية، بس وحياة أبوكم بعيداً عن اسم «ائتلاف».. تعد بنفسها مشروعاً قومياً لصياغة الحافز الذى يضمن رياضة مدرسية أرقاما قارية. بطولات عالمية!
هو ده الكلام.. أما المزيد من الهرى واللعب «الشمال» لصالح الأولاد.. فهو ده عين المصيبة!
تخيل حضرتك.. بتعلم ابنك الغش.. والحصول على حق الغير.. وفى الآخر كل ده ب%5.. ياااااه.. ما أرخص الغش.. فينك يا حكوووومة!