بالصور..الطفل أحمد السيسى نجم "ذا فويس كيدز":والدتى اختارت "دار يادار" ومعلمة الموسيقى حفظتهالى.. ويؤكد: "كاظم وتامر كانوا بيساعدونى ونانسى كانت بتبوس بس"..ومشاركتى بفيلم تامر حسنى دردشة كلام ومش رسمى

** تابعت خبر تعليق صور على جدران مدرستى من خلال موقع "اليوم السابع" وفرحت جدا
** أشجع نادى الزمالك
** مش حافظ "مفيش صاحب يتصاحب".. وأغانى المهرجات فيها كلام وحش
** مرتبط ب"حبيبة" عشان هادية ومش بترغى كتير زى البنات التانية
** فرحان بتشابه اسمى باسم الرئيس عبد الفتاح السيسى ونفسى أقابله
** بعتبر وصولى للمرحلة النهائية فى المسابقة انى احسن صوت سوا كسبت أو خسرت
منذ اللحظة الأولى لظهوره على مسرح the voice kids، استطاع الطفل أحمد السيسى، خطف قلوب متابعى البرنامج فى الوطن العربى ومصر بصوته العزب وخفة ظله وحضوره، والذى أبدى حكام the voice kids، إعجابهم به لدرجة دفعت كاظم الساهر أن يطالبه أثناء رحيله من البرنامج أن يفى بوعده بأكلة كشرى خلال زيارته القاهرة.
الطفل أحمد السيسى نجح فى تخطى مرحلة الصوت، وتحقيق أغنية "دار يا دار" لأكثر من 20 مليون مشاهدة على "يوتيوب"، وصوله إلى المرحلة النهائية، وتنافسا الفنانة نانسى عجرم، والفنان تامر حسنى، على السيسى وغنت له نانسى، أغنية "ما تيجى هنا وأنا أحبك"، وتامر غنى له "يا أنا يا مفيش"، ولكنه اختار تامر حسنى لينضم لفريقه، وقام تامر بحمله إلى الكواليس وأشاد بموهبته، مؤكدًا أن هذه السن ستساعده كثيرًا على إظهار مواهبه.
"اليوم السابع"، التقى النجم أحمد السيسى، ابن ال8 سنوات، فى مدرسته زهرة السلام الخاصة بمنطقة دار السلام، وسط أصدقائه والذى لعب معهم خلال اللقاء كرة القدم والغناء والحديث والتقاط الصور التذكارية.
"السيسى" بدأ رحلة تغريده فى الخامسة من عمره، عندما غنى أغنية "طبق السلطة" فى حفل مدرسى، وكانت مدرسته "أمل الشورى" أول من اكتشف تلك الموهبة، وطلبت من والدته أن تذهب به إلى الأوبرا لتنمية قدراته الفنية.
إلى نص الحوار
ا اسمك وعمرك؟
أحمد محمد حنفى السيسى، مواليد شهر أكتوبر 2007 عندى 8 سنين من محافظة القاهرة بدار السلام، ولدى شقيقة.
بدأت الغناء وأنت عندك كام سنة؟ ومين اكتشفك؟
وأنا عندى خمس سنين وكانت أغنية "طبق السلطة" فى حفلة مدرسية، اكتشفتنى المعلمة أسماء الشورى مدربة التربية الموسيقية بمدرسة زهرة السلام الخاصة.
هل غنيت على مسرح قبل كدة وأول أغنية غنتها إيه؟
كتير مش هقدر أعد وأولهم أغنية "طبق السلطة".
وقفت على المسرح وأنت عندك كام سنة؟
وأنا فى كى جى تو من ثلاث سنوات.
هل غنيت فى أى حفلات خارجية؟
غنيت خارج المدرسة.
مين علمك الغناء ومخارج الألفاظ؟
أسماء الشورى مدربة التربية الموسيقية اكتشفتنى وعلمتنى ولقيتنى أنا اللى بقدر أعبر.
هل درست فى دار الأوبرا ومين شجعك؟
بدرس فى الأوبرا بقالى كتير، والدى والدتى شجعونى على الدراسة فيها.
بتعرف تعزف على أى آلة؟
لا بس بحاول وهتعلم.
هوايتك المفضلة إيه؟
كرة القدم، واللعب على جهاز بلاستشين.
ايه الموسيقى اللى بتفضلها؟ ومن هو مثلك الأعلى من المطربين؟
بحب الموسيقى الشرقية، ومثلى الأعلى المطرب تامر حسنى.
بتحب تغنى لمين وتسمع لمين؟
العندليب الأسمر عبد الحليم حافظ.
هل حصلت على أى جوائز؟
حصلت على المركز الأول على مستوى المديرية بإدارة البساتين فى مسابقة الموهوبين بالغناء.
مين قدملك فى مسابقة ذا فويس كيدز؟
أسماء الشورى معلمة التربية الموسيقية.
هل مجلس الإدارة وافقت على دخولك مسابقة ذا فويس؟
لا المسابقة كانت فى فترة الإجازة نصف السنة.
لما عرفت إنك اتقبلت فى مسابقة ذا فويس عملت ايه؟
فرحت وانبسطت جدا.
الكسور فى أسنانك الأمامية عانيت منها وخلتك متقوليش بعض الحروف بشكل سليم؟ وهل حد اتريق عليك بسببها؟
لا محدش قال واللى اتريق عليه كان بيهزر معايا.
مين اختارلك أغنية دار يادار للمطرب الكبير وديع الصافى؟
والدتى هى اللى اختارت الأغنية عشان كان عندها ظروف خاصة، نظرا لوفاة جدتى قريب.
بتحب تسمع للمطرب وديع الصافى؟
بحب اسمع شوية.
شكيت إن لجنة التحكيم ممكن متلفش ليك ويعجبهم صوتك؟
كنت شاكك إن محدش يلف.
شوفت إزاى رد فعل تامر حسنى ونانسى عجرم وقوفهم عشان تختارهم؟
تامر حسنى كان مبسوط جدا إن حد فى سنى بيغنى بالطريقة ديه، فرحت جدا ومكنتش متخيل تخطى أول مرحلة.
بعد اختيارك لتامر حسنى مين اختارلك الأغانى بعد كده مسابقة ذا فويس؟
الأول كانت أمى وبعد كدة تامر حسنى.
إحساسك إيه بعد ما تامر حسنى اختارك للمرة الثانية وكان شكلك قلقان وحاطط ايدك على وجهك وساب يوسف فرج ومروان طارق؟
الصراحة مش هقول إن الاثنين وحشين احنا الثلاثة كنا حلوين بس كان فى شوية خوف على المسرح، بس بالنسبة لى كان عادى كسبت او خسرت مفيش حاجة بالنسبة.
أول مرة تغنى ما بلاش اللون دا معانا؟
أول مرة أغنيها.
أنت توجهت إلى غرفة الملابس عشان زعلت على يوسف ومروان انهم خسروا؟
كنت بعيط على مراون وقولت يوسف بس عشان محدش يقول اشمعنه هو.
هل كاظم الساهر شجعك فى المسابقة؟ ونانسى عجرم ليه دور؟
لا كان بيحبنى جدا ودائما يشجعنى كأنه بيعملنى، لا مالهاش دور كانت بتبوس بس.
كان إحساسك إيه لما نانسى عجرم قبلتك ثلاثة مرات؟
كان إحساسى حلو جدا.
هو تامر حسنى بلغك بنفسه بمشاركته فى فيلمه الجديد واتعاقد معاك؟
كان مجرد دردشة وكلام بس مش رسمى.
لما عرفت إن أغنية دار يادار عديت ال17 مليون مشاهدة على اليوتيوب كان إحساسك ايه؟
فرحت جدا وكنت بتابع صفحات المسابقة وشوفت ان اغنيتى سجلت اعلى نسبة مشاهدة.
بعد وصولك للمرحلة النهائية والأخيرة حسيت بالظلم بعدم فوزك فى المسابقة؟
لا مفيش حاجة كسبت أو خسرت بالنسبة عادى وصولى للمرحلة النهائية يعتبر أنا أحسن صوت.
هل الأغنية كان اختيارها صعب بالنسبة ليك؟
أنا بحب أغنية أنا كل ما أقول التوبة وأديتها كويس.
قعدت أد إيه فى المسابقة؟
كتير أوى مش فاكر قد ايه.
بتحب تكون مشهور وفى إيه؟
أها بحب أكون مشهور فى الغناء والكورة.
ردود أفعالك أصدقائك وجيرانك وأهالى منطقتك كان ايه بعد عودتك؟
وصلت القاهرة الفجر وأصحابى كانوا صاحيين ومستينيين لغاية ما وصلت البيت وسلموا على.
عملت إيه لما لقيت صورتك "البانر" متعلقة على جدران مدراستك؟
أنا شوفتها ومكتش متخيل إنها هتتعلق وشوفتها نازلة على موقع "اليوم السابع" وفرحت جدا بنزولها على الموقع.
هل هتستمر فى مشوارك ولا هتقف لغاية ما تخلص دراستك؟
هستمر فى مشوارى وهدى للدراسة الأهمية الأكبر.
تحب مين من الفنانين الشعبيين؟
بحب أسمع لأحمد عدوية بس.
رأيك إيه فى فرقة أولاد سليم اللبانين صاحبة الأغنية الشهيرة "مفيش صاحب بيتصاحب" وحافظها؟
حلوة بس مش حافظها.
يعجبك أغانى المهرجانات؟
فى أغانى مهرجانات مش بحبها عشان فيها ألفاظ سيئة.
أهلاوى ولا زملكاوى؟
زملكاوى.
هل أنت مبسوط علشان اسمك على اسم الرئيس عبد الفتاح السيسى؟
طبعا فرحان جدا إن اسمى على اسم الرئيس السيسى، ونفسى أقابله.
مخطط لمستقبلك إزاى هل تتفرغ للغناء؟
ماشى مع الدراسة وبذاكر وبحفظ وفى وقت الفراغ وأتعلم الموسيقى.
بتمتنى تطلع إيه جنب الموهبة.. دكتور أو ضابط أو مهندس؟
نفسى أطلع ضابط ومش هسيب الغناء.
فكرت تسيب دار السلام وتنقل لمنطقة أخرى؟
لا مفكرتش.
أحمد السيسى أنت مرتبط؟
أها كان فى واحدة اسمها حبيبة"، وبحبها عشان هادية ومش بترغى كتير زى البنات التانية.
تحب تقول إيه لمامتك وأصدقائك فى المدرسة ومدربتك وساعدوك إزاى؟
والدتى شجعتنى وقالتلى حول تعبر وأنت بتغنى ووالدى ساعدنى، وأنا بشكرهم جدا، وبشكر المدربة أسماء الشورى أنه وقفت معايا فى المسابقة وأثناء الدراسة.
فيما قالت والدة الطفل أحمد السيسى، الذى شاركتها فى المسابقة ببيروت، "إن المعلمة أسماء هى من اكتشفته، وكان عنده حفلة ودعونى فيها وأول مرة أحضره حاجة على المسرح وهو عنده 5 سنين، وبعد المسرحية ما انتهت إنه غنى واتفاجئت بصوته، وأضافت: "أن المدربة نمت قدراته واشترك فى مسابقة الإدارة التعليمية وفاز بالمركز الأول، مشيرة إلى أن اشتراكه فى المسابقة إضافة قوية مينفعش نقول لا، وأحمد هيستمر فى الغناء جنب دراسته ومش هنوقف".
وأكد محمد حنفى والد أحمد، أن احنا وجهنا أحمد للطريق الصح بالدارسة فى الأوبرا لمدة سنة ونصف، مشيرا إلى إن عدم سفرى مع أحمد لحضور المسابقة لارتباطى بالعمل.
وقالت المعلمة أسماء الشورى، مدرسة التربية الموسيقية، ومدربة أحمد السيسى، إنها اكتشف أن موهبة أحمد، بسبب ذكائه ودرجة استيعابه العالية، مضيفة أنها شاهدت إعلان ذا فويس كيدز وعرضت الموضوع على والد ووالدة أحمد، وهما رحبوا، وتابعت، إن سفرى مع أحمد كان لتدريبيه ودعمه.
وفى الوقت نفسه، أوضح علاء عبد الكريم رئيس مجلس إدارة المدرسة، أن هناك اهتماما بالطلاب وذلك عن طريق النشاطات والحفلات وتشجيع المواهب، مؤكدا أنه سيكون هناك حفل تكريم للطالب أحمد السيسى على وصوله للمرحلة النهائية فى مسابقة ذا فويس.
موضوعات متعلقة..
-المتسابق أحمد السيسى خارج المنافسة بفريق تامر حسنى فى "ذا فويس كيدز"
-بين ضحكة أحمد السيسى ودموع عبد الرحيم.. أبطال the voice kids يتصدرون تويتر
-"أحمد السيسى" يشعل حلبة ذا فويس كيدز ب"كل ما أقول التوبة"