ألو.. ليونيل من الإسكندرية: عفاريت إيه؟!.. ده قلة ثقافة

إيه المطلوب.. نتحدث ونكتب وناس تذيع وغيرهم يصورون وآخرون يقدمون شكاوى بدءا من المسؤولين إلى رب العباد ولا أحد يرد؟!
عن العفاريت يجب أن نتحدث وللأمانة العفاريت نوعان.. نوع الدجالين بيحضروه، ونوع تانى مرعب أكثر، وهو يمثل بشرا «معفرتين» الكورة!
يا سادة.. فى عالم الساحرة المستديرة عايزين ننقل لحضراتكم رأى المدير الفنى للاتحاد السكندرى ليونيل البرتغالى، فى حكاية عفاريت الكورة علشان تقرروا بأنفسكم رغم أن كلنا «جامايكا» أحيانا.. بس أهه بلاش فضايح مع الخواجات!
الخواجة البرتغالى قال: لا أدرى كيف يتحدث كبار فى الكرة سواء فى الزمالك أو الأهلى عن حكايات من هذا القبيل!
أضاف الراجل أنه شاف فى مباراة مع المصرى عمالا من النادى بيرشوا مية على شباك المرمى.. وده أصابه بدهشه!
طبعاً.. مفيش داعى نخلى الراجل يقول: «مش مصدق إنى فى مصر»!
ليونيل قالها بالفعل لما أبدى دهشته واستغرابه!
قبل ما أى حد يقول إنه فى كل العالم فيه كده نقول لحضرته بس مش بالشكل ده!
يا سادة.. فى عالم الساحرة المستديرة لا تدفنوا رؤسكم فى الرمال فهى من شدة الريح ستكشفها، دى حاجة والحاجة الثانية إن كل واحد يعمل ويقول ويصور وشعوذة ودجل على الهوا لابد من تحويله لجهات تحقيق.. حتى لو النيابة العامة؟!
تخيلوا إن فريق «شربين» دقهلية يصور مذبحة أرنب مسكين وتقطيعه أربعة أرباع، ورش دمه فى أرجاء الملعب والمرميين ويتم نشرها ولا أحد مسؤول يتحرك؟!
ناقص يقولوا لهم على بركة الله دم الأرنب ضد النحس والفشل والفشلة والفساد؟!
يا سادة.. فى عالم الساحرة المستديرة طالبوا معنا المسؤولين عن الكورة بأن يتدخلوا.. بصراحة، مصر مش ناقصة «خبل وهبل» كفاية ما يدور حولنا!
عارفين فى ظل تحفز البعض ضدنا ممكن يحصل إيه؟!
نقول لحضراتكم.. ببساطة تنهال شكاوى على «الكاف والفيفا» وكله كله وممكن بقى اللى كنا بنقول عليه «يييى.. يييى» لما يحصل معانا فى بعض بلاد القارة نصبح متهمين بيه يا أفندم؟!
يا سادة فى عالم الساحرة المستديرة إيه رأيكم فى وصف البرتغالى ليونيل أن ما شاهده يعد قلة ثقافة.
أغلب الظن أنه وصف محترم كان يمكن أن يكون بديله «قلة أدب» وكمان تخلف وفى أحسن تعبير «قلة تحضر»!
طيب والله العظيم عيب!
على السيد الوزير أن يعى تماماً أن اتحاد الكرة مات إكلينكياً ولم يعد باقياً منه إلا جسد على جهاز تنفس اسمه الدورى!
معالى الوزير تدخل سريعاً ولو بجلسات ودية ليلية وابدأ فى نشر حالة وعى، أو على الأقل محاولة!
ربنا يكرمك إوعى تسيب مصر ترجع للخلف ونعيد «قنديل أم هاشم للنور»!
الفسدة والفشلة وحدهم الأكثر استفادة وتجب مواجهتهم.. عادى يعنى؟!
يا سادة فى عالم الساحرة المستديرة.. طالبوا معى الوزارة بالتدخل ليبقى السحر والدجل مجرد حوار خبيث فليبقى سريا؟!
ظهوره للنور سيدفع بالأولاد لطلب الأعمال للنجاح!
أما الأسرة فسيقوم عائلها «بعمل عمل» لرئيسه لرفع راتبه أو إعطائه رتبة أعلى!
يا سادة.. جميعاً.. لا تتركوا هذا الوطن بهذا الشكل أمام الأجانب وأولادنا قبل الكل!
يكفى حكام الغندور ودهشة مالودا عارفين إزاى؟!
كالعادة.. الحكم يذهب، واللجنة مش عايزة مشكلة مع الكبار أهلى وزمالك، فيعود تصحبه اللعنات!
هذه المرة.. شاهدنا الحكم والمساعد الثانى لا يفكران إلا فى أن أى هزيمة للزمالك هم منها براء.. إيه ده يا كابتن غندور؟!