واقف فى طابور

طويل مستنى دورى
يا حظ تعالى ويا ساقية دورى
دورى ولفى بينا وبلاش تدوخينا
وفى أقرب مكان رسينا
رسينا ولا تتوهينا
اكتبى الفرح ليه واوعى تدوسى عليه
أنا شبعت من الألم اللى ساكن فيه
عايش فى حزن كأنه مكتوب ليه
بحلم بيوم يضحك لى نصيبى
يفتح ذراعه ويقولى أهلاً حبيبى
مستنى الفرصة تيجى ودا عيبى
بدل ما أسعى وراها وأروح لها
واقف مكانى فاكرها جاية لوحدها
بشغل دماغى بحاجات قالوا وقلنا وتفاهات
حاجات كتيرة ملهاش لازمة ووجودها عامل أزمة
وتأخذ كتير من وقتى ووقتى ما بقاش ملكى
والفرصة تضيع منى والعمر يعدى ويكبر سنى
والفرصة تجر فرصة وتعدى وأحس بحسرة
وأحط إيدى على خدى وخدى تعبان من يدى
والدمعة متحاشة فى العين والصبر صاحبنى سنين
ويعدى عليا كل ليل والوقت فيه طويل
بدور على مخدة أنام عليها مرتاح البال
إزاى وحاجات فى الدنيا تضيع أى راحة بال
ويجى عليه النهار وتبدأ رحلة الأسفَارٌ
ومن بلد لبلد ضهرى مُقَوَّسٌ محتاج سند
بدور على حظى يجى معاه فرحى
والساقية تدور تلف والعرق عندى جف
ولسة واقف فى الطابور مستنى يجى عليه الدور