"رمضان كريم.. الله حىّ" قصيدة جديدة ل"سعيد شحاتة"

"لولا رمضان ما جينا.. الله حيّ
ولا تعبنا رجلينا... الله حى"
طالعه المواكب فى البلاد
والوالى ماشى يوزّع البركات على المساكين
وف ضهره أهل العمّه والقفاطين
وطوايف العمّال ورأى الدين
زغاريت وفرحه ف كل بيت
وخيوط بتتجمع فى خيط
حضن الشوارع منتدى
والناس قصايد شعر من بحر البسيط
طالعه المواكب فى البلاد
والوالى ماشى يوزّع البركات ف ساحة كلّ غيط
رمضان كريم
والنيل كريم
وفتيل قلوب الطيبين دايمًا كريم
يا أيها الشعب العظيم
ارسم علم بلدك على أيتها حيط
واكتب نويت الصوم عن النوم والكسل
ونويت كمان أصبح لكل الناس مثل
رمضان وصل
شايل على كتفه اليمين زلعة عسل
شايل على ضهره النوى والطمي
واخد إيدين العُمى فى دراعه لطريق الله
بدأت حياة الخلق من عشق الحياه
والناس قصايد شعر من كلّ اتجاه بتهلّ
الخوف من الموت شيء ممل
والضحكه فى وشوش العباد بتحلّ وتداوي
الغاوى نقّط بالكلام غاوى
حدّاد كتب على طبل مكّاوى
الأرض دى أرضك
والعرض دا عرضك
والورد فى غيطان السما وردك
والنيّه نيّة كل واد ناوى
رمضان كريم يا سيده زينب
يا ابو الحسن يا حسين
يا فاطمه يا بنت الحسين
رمضان كريم يا "سطوحى يا ملثّم يا ابو الفتيان
يا قطب.. يا باب النبي، يا قدسى يا زاهد"
يا شاذلى يا جعفري، يا دسوقى يا طاهر
رمضان كريم يا مرشدي.. يا سيّدى عبدالكريم
يا جيلي.. يا جيلاني.. يا رفاعى يا كركري
يا قلبى يا مخاوى
رمضان حنيّن يا به يا قناوى
احضن أخوك السويسى وغنّى يا مناوي
توبك سماوى يا مصر يا بنت الرضا
يا مفرطه فى العشق وقت الفضفضه
يا معلّمانى المضمضه بعد السكات
طوفوا الشوارع بالخيول
......... واتفرجوا ع الأنتيكات
خان الخليلى وفرحة الضاهر
....... ويشمك بنتنا ستّ البنات
والمشربيات والقهاوى وقعدة البهوات
سحّرنى يا شاعر
دقوا الطبول على كافة القنوات واستدعوا مكّاوي
رمضان حنيّن يا به يا قناوى
..........
"لولا رمضان ما جينا.. الله حيّ
ولا تعبنا رجلينا... الله حيّ
ادّونا ما تدّونا.. الله حيّ
ادّونا تلاته ريال.. الله حيّ"
..............
يا اسكندريه.. قلبى فْ إِيديّا
مغرم وماشى لابس طاقيه
غنيت لناسك وطوب أساسك
غنوة محبّه جامعه الأحبّه
من سابا باشا للخمرويّه
بمبوطى أصلي.. ساند مفاصلى
وصلى ف غنايا.. ناسك معايا
ماشى ومنايا.. دقّة فوليه
رمضان جماعه.. بعد الإذاعه
نفطر ونمشى من غير نطاعه
ونبوس تراب أرضك الزّكيه
نوصل ميامى وقلوبنا ظافره
ويسحرّونا أهل العصافره
حمّص وتونه ومهلّبيه
ابنك ضناكي.. حافظ غناكى
واقف بروحى فى الليل معاكى
بمبوطى وانتو ساندين عليّا
واقف تملّي... وقت الجلّى
داير بصوتى بأهتف وأعلّى
قوم يا بن عمّي.. ليلتك نديّه
بحراوى قلبي.. والروح صعيدى
واللى يعادينى بأفرد له إيدي
فاتح وريدى باكتب نشيدى
ويغنى لأجلك البمبوطيه
عاشق هواكى يا اسكندريه
.............
"لولا رمضان ما جينا.. الله حيّ
ولا تعبنا رجلينا... الله حيّ
ادّونا ما تدّونا.. الله حيّ
ادّونا تلاته ريال.. الله حيّ
نمشى وسط العيال.. الله حيّ
نطلعوا الجبل.. الله حيّ
ننقّوا سبل.. الله حيّ"
.............
من عند بيت القاضى طالع موكب الرؤيه
طار الحمام الزاجلى ينادى
دايره السواقى وساقيه من ساقيه
عاشت بلادى وعاش هوا بلادى
مصر الوحيده اللى من قبل التاريخ باقيه
رمضان كريم..
.......... شدوا حيلكوا عشانها يا ولادى
- موضوعات متعلقة..
"للأنبيا حواديت" ل"سعيد شحاتة" عن "هيئة الكتاب"