أبو الليف

شتا وربيع او صيف وخريف
مين فينا كان حمله خفيف
مين فينا ماكنش ابو الليف
ماهو كان لازم يبقى كده
كانت سككه متسدده
صوت حساس مليان إحساس
عايز يظهر وسط الماس
حد أدى له الفرصه يا ناس
ده بقى له سنين وسنين شقيان
لو غيره كان جالو جنان
اه بتلوموا على شكله كمان
طب ماهو ده اصل الانسان
علشان صوته يظهر ويبان
كان لازم يبقى له مكان
وعشان كدا من غير تكلييف
كان لازم يبقى ابو الليف
لو بالشقا او حتى بحيله
الغايه تبررها وسيله
ده واحد من بين الناس
كان حابب فنه بإخلاص
ليه بتلوموا عليه وخلاص
عاش الدنيا وضاقت بيه
وانفض الناس من حواليه
واهو دلوقتى بشكل جديد
والحلم اهو جواه بيزيد
انسان طيب موهوب ده اكيد
يمكن غنى وسط الزيطه
كلمات كان معظمها عبيطه
يمكن ما اختارش بإتقان
كلمات على ايامنا زمان
بس عشان يظهر ويبان
كان لازم من حاجه جنان
وهو دلوقتى بقى معروف
بعد الوحده اتمدت له كفوف
غنى وغنى يا ابو الليف
بس غنا للفن يضيف
شتا وربيع او صيف وخريف
دى حقيقه مش لحظة طيف
كله يدور فى الأرشيف
هيلاقى نفسه ابو الليف