الحاجة روحية: ببيع بلاستيك قديم فى أسواق الإسكندرية عشان ألاقى لقمة العيش.. وعايشة فى وسط كوم زبالة.. ونفسى فى شقة أسكن فيها ومعاش أعيش بيه مع أولادى وأحفادى

"أنا عايشة فى كوم زبالة مع عيالى وأحفادى وببيع البلاستيك القديم عشان ألاقى لقمة العيش وأعرف آكلهم" بهذه الكلمات بدأت الحاجة روحية حديثها وهى تحكى معاناتها مع ظروف المعيشة الصعبة مع أسرتها وغلاء الأسعار وكيف تحصل على الرزق من مهنة بيع البلاستيك".
الحاجة روحية تعمل فى بيع البلاستيك لقلة الرزق
وقالت الحاجة روحية " أنا بجمع البلاستيك من البيوت وأبيعه عشان ألاقى فلوس أجيب بيها أكل لولادى وأحفادى ال 8 عايشين معايا فى أوضة واحدة تحت الأرض بمساكن دربالة بالإسكندرية بالإيجار ب 350 جنيها فى الشهر وياريتها عيشة نضيفة، أنا عايشة فى كوم زبالة مع القطط والفيران والحشرات بس مضطرة إن أعيش فيها عشان ده اللى موجود وعلى أد حالى".
نفسى فى شقة أسكن فيها ومعاش أعيش بيه أنا وأولادى وأحفادى
وأضافت الحاجة روحية" أنا اشتغلت كل حاجة عشان أربى عيالى وسكنت فى أكتر من شقة بس بسيبها عشان بيبقى سعرها غالى ومعندناش معاش نعيش منه وجوزى بيشتغل معايا فى بيع البلاستيك هو يجمع وأنا أفرز فى البيت ونبيعه وزى ما يجبلنا عايشين على باب الله يوم نلاقى أكل ويوم منلاقيش".
وأشارت الحاجة روحية أنها تعيش فى غرفتها التى تقسمها إلى قسمين جزء تعيش فيه مع زوجها وبناتها والجزء الثانى يعيش فيه ابنها المتزوج وأحفادها ، قائلة" المكان ضيق ومدفون تحت الأرض ساعات لا أقدر أخد نفسى من كترة الرطوبة والزبالة اللى حولينا".
نفسى فى شقه ومعاش
وطالبت الحاجة روحية بسكن مناسب لها فى مساكن المحافظة ومعاش ثابت تستطيع أن تعيش منه مع أفراد أسرتها ال 5 قائلة " إحنا داخلين على شهر رمضان والحياة بتبقى صعبة فيه، وربنا بيرزقنا من ولاد الحلال بس نفسىى فى معاش عشان ما نمدش إدينا لحد".