قاسيتى يامّه كتير

لسه فاكر كل حاجة زى ما تكون من يومين
لسه فاكر حضنك انتى يامّه يا نبع الحنين
لما كنت فى مرة أغلط كنتى تيجى تزعقى
وأما أغلس ع الضيوف من بعيد بتبرقى
نفسى أرجع طفل تانى جنب منك..
تنداهينى.. تزعقيلى..وتقوليلى يا "شقى"
بتجمعى ما تفرقى لو حتى عندك كوم عيال
الفرحه موصوفة ف عينيكى وانتى شايلة هموم جبال
عمرى ما أنسى أحلى دعوة الصبح منك
يستر طريقك يابن بطنى.. يوقفلك، ولاد حلال
بتربى فينا تكبرى... بنزعلك وتكبرى
وفى عين حسودنا بكف إيدك فى وشهم بتكبرى
وإن حد خبط ع البيبان وسط الصلاة بأعلى صوت بتكبرى
قاسيتى يامّه كتير وياما
والشقا سايب علامة
ولما كبرنا سيبناكى
وقارناكى ب فولانة
ف عيدها هانوها واحضنوها
وامسكوا إيدها ورجليها وبوسوها
دى الجنة تحت أقدامها.....
راعوها...تدخولوها !!
نظرها ضل.. خليك عينيها
سمعها قل.. النبرة عاليها
البرد حل.. غطيها..دفيها
مراتك تغل.. أوعى تبديها
أيامها راحة مش لسه جاية
دعوتها راحة ورضاها غاية
اقروا عنها فى أى دين
هتلاقوا فيها حديث وآية