بالصور.. من تأميم قناة السويس لتأميم عربات الفول.. "المدمس يكسب"

"المدمس".. هو النداء الذى لم يغيره طوال عشرين عامًا قضاها "أبو أحمد" خلف "عربية الفول المدمس" التى جابت شوارع مصر حتى استقرت حاليًا فى إمبابة. الهروب من البلدية وتحمل حملات التفتيش روتين يومى فى حياته طوال رحلة طويلة مع الفول، ولم يتخيل أن يأتى اليوم الذى تعلن فيه الدولة عن ضمه هو وعربته لصفوفها، وبمعنى أصح تأميم عربته وضمها إلى القطاع الرسمى مثل آلاف عربات الفول فى مصر والتى أعلنت وزارة التموين قبل أيام عن سعيها إلى تحويلها إلى القطاع الرسمى بعد حصرها، على أن تتكفل الوزارة بتدعيم عدد من السلع لهذه العربات مقابل تخفيض سعر ما تقدمه للجمهور.
"أبو أحمد" كغيره من أصحاب "عربيات الفول" لم يعارض القرار الذى تفكر فيه الحكومة على الإطلاق، ببساطة يقابله بكلمة واحدة "يا ريت"، قبل أن يبدأ تفسير رأيه: "أنا بشتغل على عربية الفول من سنة 85 وعمر ما الحاجة غليت زى دلوقتى، لو هيدعموها ويرخصوها علينا وعلى الناس يبقى يا ريت".
ولكن فى ظل هذا لديه العديد من الأشياء التى يؤكد عليها: "لازم الموضوع يدرس كويس، ونعرف هناخد إيه ومن مين، ويكون فى سهولة إننا ناخد السلع المدعمة عشان نطور الشغلانة بدل ما نهدها".
خلف عربة ملحقة بموتوسيكل يقف أبو فهد الذى ورث المهنة أبا عن جد قبل أن تستقر عربته فى شارع جامعة الدول العربية، ولم يختلف رأيه كثيرا فى تأييد الفكرة، ويقول: "أنا بعمل طبق الفول بأربعة جنيه ونص، لو الحاجات بتاعته وقفت عليا بنص التمن هديه للزبون بنص التمن وأنا فرحان".
ويتابع: "إحنا من سنين نفسنا يبقى لينا قانون وندفع للبلد حقها والضرايب اللى علينا بدل ما بندفعها رشاوى للمفتشين والحى.. البلد تاخدها وهى هتعود علينا فى الآخر بدل ما هى بتروح فى جيوب ناس مش من حقها.. أحب ما علينا أن البلد تنظمنا ونبقى مرخصين وناخد حاجات بسعر كويس ونديها للزبون بسعر كويس".
إلى جواره يقف خالد أبو طبيخة، زميل المهنة منذ سنوات، ويقول: "سمعنا الموضوع ده أكتر من مرة السنة اللى فاتت لكن المشكلة أن الشغلانة كبيرة، من أول العيش والخضرة والعدس والفول والزيوت وغيرة، لو الحكومة هتقدر توفر لينا كل ده وتدير الموضوع بشكل كويس يبقى يا ريت".
أبو أحمد عشرون عامًا مع الفول
أبو أحمد يبيع الفول
أبو فهد على عربة الفول
أبو فهد أثناء العمل
خالد أبو طبيخة
أبو فهد أمام عربته