بالصور.."الموت" يحاصر أهالى عزبة جرجس.. حياة الآلاف مهددة بسبب تصدعات منازلهم ومياه الصرف الصحى.. والسكان: "خايفين البيوت تُقع علينا".. "والمسئولين بيجوا يتصوروا ويمشوا"

"عزبة جرجس" أحد أكبر المناطق العشوائية فى القاهرة الكبرى، يسكنها آلاف الأسر المهددة حياتهم بالخطر باستمرار بسبب تصدعات فى منازلهم ومياه الصرف الصحى التى تخللتها وأدت إلى انهيار جزئى بها، متخوفين من سقوط ما تبقى منها على رؤوسهم فى أية لحظة.
إحدى الشرفات المائلة
"احنا قاعدين هنا على كف عفريت وخايفين البيوت ُتقع علينا، واحنا قاعدين مترددين هنروح فين ونسيب بيوتنا" هكذا عبر أحد الأهالى يدعى "محمد كمال" عن خوفه من أن تكون نهاية حياته تحت الأنقاض.
وتابع: "احنا قاعدين خايفين المطر تيجى توقعلنا بيوتنا، لأننا أسرة 8 أفراد هنروح فين ومفيش شغل والبلد كلها نايمة وواقفة، والكهرباء ملمسة فى قلب المياه ولما بنبقى خايفين بنبات عند قرايبنا"، موجهًا رسالته إلى المسئولين قائًلا: "خلوا بالكم على الغلابة اقفوا معانا احنا حياتنا على كف عفريت"، مضيفًا "محدش بيهتم بأى حاجة ييجوا يتصوروا ويمشوا واللى واقف معانا ربنا هو اللى حامينا وفوق كل شىء".
سيدة تشكو من المسكن الخاص بها
وقالت "عزيزة محمد ثابت"، أحد سكان العزبة،"الحكومة جاية عايزه تهد لينا البيت ويعملوا الحمام جوا الأوضة قولنالهم عايزين مكان برا مش هنا، ويا أما تبنى مساكن يا تسيبونا زى ما احنا"، مضيفة "الحياة قرف فى قرف ومفيش حد بيساعد"، مختتمة كلامها "احنا مدفونين تحت الأرض".
فيما ذكرت "هويدا أحمد" تسكن فى العزبة منذ 21 عامًا، خلال حديثها ب"فيديو7"، قناة اليوم السابع المصورة، عن استيائها من قرار الحكومة بإعادة تسكينهم فى أماكن وصفتها بالعشوائية، قائلة "معايا 6 عيال والمجارى عايمة بينا والبيوت بتنزل مياه وهتقع علينا، والمحافظة عايزه تعمل مساكن بديل لها عشوائية، وبعد ما خلونا نخلى بيوتنا وبعد كدة قالولنا مش دلوقتى فى المرحلة التانية، مرحلة ايه دى وأمتى".
سيدة تخرج من غرفتها المهددة بالانهيار
وقال "محمد سعيد" من ذوى الإعاقة "قالولنا هيهدوا العزبة ومفيش بديل ولحد دلوقتى مش لاقى سكن، احنا عايزين مساكن والسقف هيقع علينا"، متسائلاً "فين البديل، مفيش بديل، وأنا موظف قطاع خاص مرتبى كله 500 جنيه وبيروح نصه علاج ليا أنا ومراتى".
وذكر أحد الأهالى "ياسر على محمد": "اتكلمنا مع المهندسين وورينالهم الشروخ والسقف اللى واقع، ولو البيت ده وقع علينا الأطفال الصغيرة هتموت، يعنى نعمل أيه ونشتكى لمين؟، ولما المحافظ جه محدش عرف يتكلم معاه وكل ما تيجى تقرب منه يزقوك كأنه ملاك نازل من السما مش محافظ"، فيما تابعت "أم محسن": "بيتنا مفيهوش مياه بنجيبها من برة بالفلوس وكان عندنا أوضة دور تانى سطحها وقع من الهواء، وفى الأخر عايزين يبنولنا بيوت سقفها من الخشب، هما كده عملولنا أيه هى هى نفس البيوت".
شخص من ذوى الإعاقة يؤدى الصلاة
وأضاف صلاح سيد: "أنا مولود هنا وبنعانى من البيوت وجالنا المحافظ بيقول أنهم صارفين 50 مليون جنيه على تطوير المكان، فين التطوير ده، إحنا ما بنامش وبيبنوا لنا نفس البيوت اللى كنا قاعدين فيها بس مساحتها أقل، لو ده يرضى أى مسؤول فى البلد إحنا موافقين ننام فى أوض جوه حمامات"، متابعاً "بنبقى ماشيين على الأرض وكأننا طالعين على جبل"، مطالباً المسئولين "بصوا للغلابة شوية".
تلامس أسلاك الكهرباء
عزبة جرجس
المجارى تحيط بسيدة وطفلتها
سيدة وزوجها يشكوان ل"اليوم السابع" أحوالهما
الحمامات داخل غرف ساكنى العزبة
غرفة نوم تسكنها القمامة فى أحد العقارات المهددة بالانهيار
هبوط أرضى بغرفة نوم بأحد المنازل
انهيار جزء من سقف منزل
ابتسامة طفل بالعزبة متحديا ما يواجهه من خطر
كوفريه كهرباء غير مغطى يهدد حياة المواطنين
الحيوانات تأكل من القمامة على أنقاض عقار منهار