إحنا هو إحنا يا خال

بقالى أكتر من عشر سنين من عمرى بعانى من تجربة اليوم المقلوب.. يعنى بسهر الليل لحد ما نور الشمس يطلع وأصحى آخر النهار وممكن مع الغروب، تقريبا بيكون البشر الطبيعيون خلصوا أشغالهم.. ماعرفش إيه السبب ممكن أكون أجبن من أنى أكون جوه دائرة البشر الطبيعيين.. لأن التواجد بيولد تعامل والتعامل بيولد مشاعر كتيرة أوى - ما علينا- وقت حضرتك فى غنى عن أنه يسمع شويه تفاصيل بنى آدم معجب أو رافض لقلبه يومه.
كنت فى أحد الأيام هارب من النوم فى بيتى وبايت بره البيت.. وبعد ما خلصت كل اللى بعمله قلت أروح أنام فى بيتى.. بمبدأ سريرى أولى بى، وقبل ما أوصل للبيت بحوالى 10 دقائق فوجئت أننا فى أواخر ديسمبر.. وامتحانات التلامذة ابتدت.. وأنا بالنسبة لى بتمر الأيام وبتجرى وبتفضل كلمة التلامذة هى الأمل.. أيوه يا سيدى الأمل.. أنت فكرك يعنى أنا واحد زى مثلا عنده (أمل) فى نفسه لا طبعاً أنا كل أملى فى كلمة تلامذة دى لعل وعسى نوصل لحاجة فى يوم من الأيام.
وأنا فى طريقى للبيت تنحت فى مشهد ومش قادر يطلع من دماغى قلت لما أكتبهلكم عشان تتنحوا معايا وكلنا نبقى متنحين.. المشهد كان عبارة عن أب فى آخر الأربعينات ومعاه بنوتة صغيرة ييجى 10-12 سنة.. وماشيين وهما الاتنين بيحاولوا يقاوموا بقايا سلطان النوم.. عارفين اللى علق معايا ومش قادر أنساه من دماغى هو أيه.. النتيجة.. أيوه النتيجة مش النتيجة اللى بتظهر بعد الامتحان.. لكن النتيجة اللى بناخدها معانا الامتحان.
تصدق دى البنوتة أم ضفاير شايلة معاها كيس طويل من بتوع أكياس السكر.. بس شايلة جوه الكيس ده نتيجة سنة من السنين عارف بيعملوا بيها أيه بقى النتيجة ؟؟
ولو حضرتك من ولاد التعليم الحكومى هاتفهمنى..النتيجة دى عبارة عن اختراع عالمى يعنى المفروض عشان الناس تعرف بيه مواعيد المناسبات فى السنة الجديدة بس إحنا بقى الوحيدين اللى خلناه اختراع جدير بالذكر.. عشان النتيجة دى بتكون مع التلميذ ليه بقى... عشان يسند عليها على التخته (الديسك) عشان التخته دى غالبا بتبقى منتهية الصلاحية يعنى مليانة حفر أكبر من حفر ال...... وطبعا لو الطالب من دول كتب بالطريقة دى على ورقة الامتحان الخفيفة هايحصل أيه..؟؟ حاجة من اتنين يا الورقة تتخرم يا الورقة تتخرم..عشان كده التلميذ الشاطر لازم ياخد معاه حاجتين مهمين..رقم جلوسه...ونتيجة يسند عليها
عشان كدة روحت وأنا مطمن جدا.. إذا كانت التختة بتاعتى اللى بقالها 20 سنة فى المدرسة لسه مخرومة والخرم ما تسدش...تفتكر يعنى إيه اللى ممكن يصلح الباقى قصدى يسد الباقى ؟؟؟؟
أرجو أوعى تركز فى أى حاجة حواليك هاتتعب صدقنى هاتتعب.