المذيعة مها بهنسى تؤكد خبر وقفها عن العمل

أكدت المذيعة مها بهنسى، أن قرار إيقافها عن العمل بقناة التحرير، قرار صحيح، مؤكدة أنها ستعود مرة أخرى، مضيفة، "أحب أشكر الناس اللى بعتتلى آلاف الرسائل ومئات التليفونات التى لم تتوقف لدعمى والتضامن الكبير معايا لفهمهم ما حدث من تشويه لي".
وأضافت عبر صفحتها على "فيس بوك": " المعركه اللى ضدى معركة سياسية وليست بسبب تصريحات بدليل أنهم نسيوا الجناة والمجنى عليها ومسكوا فى كلمة غير مقصودة على الهواء، ولكننى لن أضعف وسأظل أحارب كل من خان مصر، وسأظل أدعم كل مؤسسات الدولة من جيش وشرطة وقضاء".
وتابعت: "لازم تفهموا أن الحرب الجاية هتكون ضد نساء مصر علشان شلنا أرواحنا على أكتافنا وأنقذنا البلد من الخونة والإرهابيين بنزولنا فى استفتاء الدستور وانتخابات الرئاسة".
واستطردت: "فكر لو لثانية مش ممكن أكون أنا صح حتى لو 1% و فعلاً تصريحى (الشعب مبسوط خليه يهيص) كان على فرحة الناس مش على واقعة التحرش!!.. والأغرب أن الناس اللى قال إيه بيدافعوا عن الستات اللى بيتم التحرش بيهم جايين الصفحة يشتمونى ويتوعدونى بالتحرش والاغتصاب، علشان بس تفهم أنهم بيحاربوا شخصى لدورى فى محاربتهم وكشف حقيقتهم وطبعًا أقصد الإخوان والطابور الخامس".
وتابعت "طيب فكر كمان ثانية تانية واحدة، مؤيدة للجيش وللسيسى وانتخبت السيسى ولم تتوقف عن دعمه" اللى هو أنا " هقوم افرح فى ست زيى مؤيده للسيسى زيى نازلة تحتفل بفوز السيسى زيى إن كلاب سعرانة اتحرشوا بيها! أى منطق وأى عقل يصدق الكلام دا".
واختتمت قائلة: "أحب أعتذر لكل مرأة ورجل تأثروا بالفيديو والتصريح الغير مقصود نهائياً ومن الطبيعى أن أى حد عاقل لا يمكن يصدق أن مرأة تؤيد التحرش والتحرش مرفوض بكل معانى الكلمة، ولو وصل الحكم على المتحرش بالإعدام هكون من أول مؤيدى للحكم".
موضوعات متعلقة..
قناة "التحرير" تتجه لوقف المذيعة مها بهنسى عن العمل