وصلة ردح بين "داليا زيادة" و"محمد عادل" على "فيس بوك" حول التمويل

نشبت معركة ساخنة بين الناشطة الحقوقية داليا زيادة المدير التنفيذى لمركز ابن خلدون، والناشط محمد عادل عضو حركة 6 إبريل، على موقع التواصل الاجتماعى "فيس بوك"، وذلك حينما بدأت "زيادة" تتساءل عبر صفحتها عما إذا كان الإعلامى أحمد منصور المذيع فى قناة الجزيرة القطرية خال الناشط محمد عادل، قائلة: "هناك كلام خطير جداً يتردد بقوة أن السيد أحمد منصور أوف إخوان يكون خال السيد محمد عادل أوف 6 إبريل.. أتمنى أحد الطرفين يؤكد أو ينفى للضرورة".
الأمر الذى أثار غضب "عادل" ودفعه للدخول معها فى معركة واتهامها بأنها تعمل فى منظمة تتلقى تمويلات أجنية من الكونجرس الأمريكى، وأن قرابته ب"أحمد منصور" أفضل من التمويلات.
من ناحيتها، ردت "زيادة": "أولاً إحنا منظمة مجتمع مدنى، لما ناخد تمويل ده طبيعى، لكن أنت و6 إبريل وخالك أحمد منصور لما تاخدوا تمويل كحركة سياسية يبقى بتاخدوه ليه، ولا أفكرك بفريدوم هاوس وجريكم وراها؟ ثانياً إيه علاقة الكونجرس الأمريكى اللى اتقفل مكتبه فى القاهرة من 3 سنين بالموضوع، ولا هو أى هرى فى أى حتة وخلاص؟ ثالثاً: مركز ابن خلدون كان قافل يوم ما جيتوا تولعوا فى الإخوان، ومركز ابن خلدون وأنا شخصياً اللى طلبتم منها وطلبت أنت بشكل شخصى تمويل للحركة بتاعتك السنة اللى فاتت ولما أنا سألت وعرفت أنك هتاخد الفلوس تحطها فى جيبك مش للحركة، طبعاً طنشتك ويمكن هو ده اللى مضايقك مش قفل المركز اللى كان مقفول أصلاً بشكل رسمى يومها".
وتابعت داليا: "رابعاً بقى وده الأهم من أى حاجة: أحمد منصور خالك ولا قريب الست الوالدة من بعيد مثلاً؟ والنبى رد على السؤال ده وسؤال آخر تابع ليه: لماذا قام أحمد منصور أوف إخوان بتمويل مؤتمر القلة المندسة بتاع حركة 6 إبريل فى 2010 هو وجورج إسحق وأيمن نور؟ كفاية كده ولا تحب أسألك أسئلة أكتر؟".
مما دفع النشطاء للتعليق على كلام "زيادة" والسخرية، قائلين "داليا زيادة ومحمد عادل بيعايروا بعض بالخيانة والعمالة والتمويل"، مستنكرين اعتراف "زيادة" أن منظمات المجتمع المدنى تتلقى تمويلات أجنبية.
كما تساءل البعض: "أين يذهب التمويل التى تتلقاه منظمات المجتمع المدنى؟"، مطالبين بالتحقيق فى أمر هذه التمويلات، وكان رد "زيادة" عليهم: "كل حاجة بناخدها بتخضع لرقابة البنك المركزى والجهة المانحة ووزارة التضامن، يعنى مستحيل نصرفها فى غير المشاريع الخاصة بها والمعلنة على موقعنا وفى الإعلام بخصوص أنشطتنا طول الوقت".
من ناحية أخرى، استغلت بعض الصفحات الإخوانية هذا الحوار لتشن حرباً على منظمات المجتمع المدنى و6 إبريل وفضحهم واتهامهم للعمالة وبتلقى التمويلات الأجنبية.