الحزن المنحوت

كل ما أحاول أنسى
جرح وظلم السنين
ألاقى الأحزان بتنده
وأرد أقول أنا: مين
تقولى بلاش معاندة
دا أنتَ صاحبى الأمين
لوسِبتَّك يوم بتفرَّح
بحس بالحنين
كأن أنا وأنت
عشاق ولهانين
*********************
أحبابك بيضيعوا منك
بياخُدهم مِنَّك موت
ومهما تصرخ وتنده
مفيش غير السكوت
مفيش غير الجراح
وحزن جوَّاك منحوت
كأنه نقش الفراعنة
على معبد أو تابوت
****************************
إهداء: إلى أرواح الذين أحببتَهم وأحبُّونى .. من لم أتخيل الحياة بدونهم ولكنهم تركونى.