الشارع لمين ؟ !

على رأى عمى صلاح جاهين «الشارع لكل المصريين» اللى نزلوا الشارع محتجين واللى عارضوا وقالوا مش نازلين واللى قرروا يكونوا مؤيدين مش فاهمين بس اسمهم متظاهرين، عملنا ثورة كل اللى قالته «عيش حرية عدالة اجتماعية» طب يا ناس يا خلق الله هو إحنا طلبنا المستحيل؟ ردوا علينا بكلام مترتب قالولنا «الثائر الحق يثور ليهدم الفساد ثم يهدأ ليبنى الأمجاد» قلنا نبنى قالولنا انتو مين؟ قولنا دستور قالوا انتخابات وقتها نص شبابنا مات وكانت ملحمة الصمود «محمد محمود» وقتها قالوا علينا ملحدين ضد الدولة وضد الدين وراحوا على الصناديق وانتخابات على دم الثوار الحقيقيين جيكا والشيخ عماد، وفجأه جالنا واحد بدقن قال أنا من هنا وعاوز أحكم علشان ده حقنا ولما سألناه انتو مين قال إحنا جماعة من المصريين على بلدنا خايفين وهنجمع الناس وهنبنى بلدنا بالديمقراطية وصدقناه ومشينا وراه وفى يوم حكم مصر برلمان ومن بعدها رئيس وفجأة ومن غير سكات شد الشدة وشمر الحدفات واللى حوالينا كله مات قلنا الدم حرام وكلمونا سياسة قالوا «أتتبعون دينا جديدا وخرجتم عن دين أبائكم»، لك أن تنضم للأهل والعشيرة أو تتفرج على قناة الجزيرة!!
قام المصرى فى يوم 30 رده كان أقوى دليل وكالمعتاد يصنع التاريخ ويقول للعالم كله أنا قررت التغيير ودلوقتى دورك يا ثورى تحمى إنجاز الشعب العظيم، إياك تدى فرصة للخونة الإرهابيين يزايدوا ويهتفوا بروح أطهر الطاهرين اللى ماتوا علشان هما بس مصريين، تعرف بقى وقتها ليه غيبوا عقول الملتحين علشان يبقوا مؤيدين وهما مش فاهمين ونغير حاجات بسيطة كده واهو كله بيعدى «الحرية» تبقى «شرعية». عاوز شرعية؟ أنا موافقك ﻷنى كمان كنت بدور عليها بس عارف جبتها منين!! من المواطن اللى فى الشارع أصل هو صاحب الشرعية، عاوز تتكلم مع الغرب وتبكى وتولول على الماضى وماله بس المهم: أنت مين أصلا علشان تتكلم مع الغرب؟ مش معنى أنك إخوانجى تفتكر نفسك قيادة دى مصر أكبر منك ومن جماعتك والحقيقة أنك وﻻ حاجة. عايز تتظاهر وتعبر عن رأيك؟ أنا موافقك بكل سلمية لكن ترفع سلاح فى وش أخوك المصرى عسكرى كان وﻻ مدنى يبقى أنت مش مصرى، أصل المصرى يعنى أصل وهوية مش جماعة إرهابية، والحقيقة أن الثائر الحق هو اللى يكمل ثورته ونرجع تانى نسأل الشارع لمين؟ الشارع لكل المصريين الوطنيين اللى على مصر خايفين.