هديل قلبك

وبغرق جوه ف عيونك وبستنى
تمشينى ف حنين روحك وأتمنى
تكون جوايا نور وحياة وكام غنوة
تدفينى ببرد الشوق تطفينى بنار حالنا
وأدوب ويا هديل قلبك من الرقة
بضحكة طايرة تُسكنى وليك سابقة
وأضفر م الحنين واحة نعيش فيها
وأتوه جوه ملامح للهوى سارقة
تعالى اخطفنى من نفسى وبات فيها
وكلمة حُب عِيش ليها وفيها
وأوهب لى حياة من نبض تكوينك
وضُم إيديا بين حُضنك ودفيها
وليل الفرح هيليّل بلون عينك
وبين رمشى هشيلك جوه وأعينك
وأفكر فيك ما بين التانية والتانية
ولو نبعد يعينى ربى ويعينك
يا طعم الشهد والفرحة وضى الماس
وشط القلب وسط الموجة والإحساس
يا نبع الحُب والكلمة وصوت الشوق
عيونك بحر وبتدبح كتير م الناس
نجوم بتغار من الضحكة وليك نظرة
تقول أشعار ومين يسمع ومين يقرا
أنا عايزك تعطشنى وتروينى
بسحر الكون وسر الحكمة والفكرة