حلم ليلة صيف

على شط الهانوفيل
خدنى الشوق لهناك
وهناك شفت حوريه
بتنور فى الميه
وتقول أنا سوسيه
فى العوم باتحداك
مين قدى مين قدى
وسط الموج أنا أعدى
ضربة إيد مع رجلى
زى صاروخ فتاك
قلتلها شرفتى
وفى شطى نورتى
قالتلى قوم انزل
ليه كلام وياك
قالتلى شوف قدى
تحت الموج بيعدى
قلتلها طب هدى
عند الصخرة هناك
وقعدنا نتسابق
والموجه أخدتنا
ترفعنا بحنيه
وبحب تهدهدنا
وصوت م اليه يقوللى
حلوه الدنيا معاك
وقعدنا ع الصخره
مع نسمة عصريه
والموجه توشوشنا
بكلمة حب شقيه
نتكلم بالهمسة
والعين ويا اللمسة
لحد الشمس ما غربت
واحنا لسه هناك
ونزلنا فى الميه
والموج يلعب بينا
قرب الشط سابتنا
بنكمل غناوينا
والحلوة السويسية
سابتنى فى الميه
قالتلى يا روح قلبى
بكرة أنا ح استناك
جه بكره وجا بعده
وأنا قاعد باستنى
باحلم إنها ترجع
وبقربها أتهنى
واهى فاتت الأيام
عايش فى الأوهام
ويوماتى اتمشى
عند الشط هناك