المصرى طول عمره شهم وراجل

لكنه من كتر الأسى بقى يخاف يتظاهر
ما كان يعجبه غلط ولا كان فيوم عاطل
ضربوا بيه المثل فى الكرم وفى الجدعنة
يشوف محتاج يكبش ويديله
والأكل لجاره متغطى بمنديله
فقير أو غنى تلقى النضافة طبعه
شبعان.. جعان تحس القناعة عنده
وهوه ما حيلته حاجه!!
تلقاه شاكره.. كده وحمده
تلقى الرضا دينه
تاخد عنيه بالحب
وعدوّه إللى يهينه
مش هوه إللى عدى قنال
وكان شديد العزم
ومضرب الأمثال
وكان زئيره زئير أسد مجروح
مرار الهزيمة ف قلبه
ساكت ما كان بيبوح!!
لما قالوله يومك يا بطل
كسّر حصون وصروح
ورفرفت روحه
وما شفنا حد ينوح!!
أصله شهيد النصر
مسح سنين الغدر
خلانا نرفع راسنا فوق عالى
وسمعنا صوت الفرح والموالى
قالوا راح الشهيد وهنقرا عليه فتحة
بس يا خساره ابنه عاطل قاعد على القهوة
وأخوه مهاجر يدور.. يفلح أو يموت غرقة
ونشوف ناس كانوا تحت السرير ف الغارة
كانوا بيجروا يستخبوا جوه بدروم ف الحارة
ما كنش حيلتهم حاجة
دلوقتى شوفهم ف القصور عايشين
وملكوا كل البلد وطيارات راكبين
وسابوا الجعان يسند العيان
يغرق ف عبارة أو يتشوى ف النار
لا عندوا حتة تلموا ولا عنده حتى دار
شوفتوا المصرى كان زمان إيه
وشوفتوا حاله دلوقتى بعد ما ركبه البيه
كل إللى فاضل ليه
اسمه لسه مصرى.. وجنسيته كمان مصرى!!