شعب اللامؤاخذة!!

قبل متشتم لمجرد إنك قرأت العنوان، ادخل اقرأ الموضوع الأول عشان بعد متفهم متجيش تقولى "لمؤاخذة" أنا آسف مكنتش افتكر إن الموضوع كده
ليه تحط نفسك فى موقف ضعف وإنك تعتذر لهذا وذاك وتقول آسف ولمؤاخذة.
مسألتش نفسك أنا هتغير إمتى؟؟!!
ليه تسيب عربية سيادتك فى نص الشارع وأول متشوف الناس مضايقة ومخنوقة عندهم حق ياخى وفى الآخر تقولهم "لمؤاخذة" كنت بصلى حرام عليك ظلمت الصلاة معاك ما هكذا تؤكل الكتف!!
ليه تكون عربيتك متنفعش تمشى فى الشارع ورخصك مسحوبة وكمان تمشى عكس، وأول متلبس تقول "لمؤاخذة" اصلى مستعجل.
ليه تشوف حد جاى من بعيد وتتربص ليه عشان تخضه وفعلا تعملها وتلاقيه قلبه وقع وجاله هبوط حاد واغمى عليه وفى الآخر "لمؤاخذة" والله كنت بهزر.
ليه تلاقى قدام بيت حضرتك صندوق زبالة وتروح ترميها تحطها برة الصندوق وتبوظ الشارع ولو حد كلمك "لمؤخذة" يعنى هى جات عليا.
ليه تشتم الأكبر منك وتهينه وتحرجه قدام الناس وأول محد يقولك دا قد أبوك تقوله "لمؤخذة" والله ما كنت أقصد.
ليه تعاكس فى بنات الناس اللى رايحة واللى جايه ولما حد يقولك معندكش أخوات بنات تقوله "لمؤاخذة"، ما هما بردوا اللى بيجبرونا على كده. لمؤاخذة أنت تفكيرك حيوانى عقيم!!!!!
ليه تركب مواصلة عامة وتشغل الموبايل عالآخر سواء قران أو غيره ولو حد كلمك تقولوا "لمؤاخذة دى حرية شخصية، لاحضرتك حريتك الشخصية تنتهى عندما تبدأ حرية الآخرين".
ليه تتخانق أنت وأعز أصدقاء عمرك عشان السياسة وتتعصب لرأيك وتغلط فيهم وأول مترجع لشعورك تقولهم "لمؤاخذة" أنا آسف.
ليه ليه تبقى موظف حكومى وبتقبض من ضرائب الشعب ورايح عشان تخدموا، ويروح عشان يقضى مصلحتة ميلقكش ويفضل مستنى سيادتك وأول مترجع تقولوا "لمؤاخذة" كنت بودى العيال المدرسة وبجيب الخضار للمدام.
إحنا ليه بنشتم فى بعض؟ وبنقطع فى بعض؟ وبنذكر أسوء ما فينا؟ احنا بقينا وحشين أوى ليه كده؟ بقينا عدائيين أوى ليه كده،؟
لو كلامى معجبش سعادتك وجيت عالجرح ف"لمؤاخذة" بفكرك بآدميتك مش أكتر.