العيشة هتبقى سودة

لتر البنزين هيغلى لو كان عاجب سيادتك
وكمان النور هيقطع ويضيع فى الضلمة وقتك
والنهضة ضرورى جايه بس أنت اصبر شوية
هيلبسوك خازوق تقعد عليه براحتك
...
والأنبوبة اللى كانت زمان باتنين جنيه
بيقولوا بقت بعشرة جنيه ينطح جنيه
وهتبقى بالكوبون يا تطبخ على الكانون
واسأل ستك وخالتك ياما طبخوا عليه
...
وهات لك فحم أسود زى بتاع القهاوى
واشوى بدل ما تطبخ واطفح لو كنت غاوى
اللحمة كمان هتغلى والسعر هيبقى أعلى
مش هتشوفها بعنيك لو حتى عملت حاوى
...
أما الرغيف فحاول فى اليوم تأكل رغيف
يا بلاش تأكل وحاول أحسن تنام خفيف
أصلك مش هتلاقيه وهتدور عليه
وخصوصا لو سيادتك بتاكل عيش نضيف
...
من الآخر يا صاحبى العيشة هتبقى سودة
واللقمة لو لقيتها هتلاقى فيها دودة
مادام الإخوان معاك الهم وراك وراك
وأمانه إن شفت حسنى قوله يا ريس بعودة