بالبلدى ممكن يفهموا

بالبلدى كده عايزين حد يفهمنا و يقرب لتفكيرنا ويعرف شعبنا عايز إيه من غير اعتصامات ولا مظاهرات. عايزين حد ذكى "الله يرحمك يا سادات". شوفنا البرنامج بتاعه وقولنا مفيش مشاكل هيشتغل ويبقى تمام واختاره المخفى اللى اسمه "الصندوق" اللى عمرنا ما شوفنا من وراه حاجة كويسه أبدا وقولنا ماشى واحنا "عاصرين على نفسنا لمونه".وجالنا وجاب أهله وعشيرته معاه وقولنا برضو ماشى هيشتغل ويبقى كويس.. من الآخر مفيش فايدة فيه ولا فى أهله وعشيرته. إحنا عايزين حد يحلم بنفس أحلامنا عايزين نشوف أى حاجة على أرض الواقع, يا عم ورينا طريق اترصف، ورينا جنينه اتعملت، ورينا شوارع اتنظفت ورينا مدارس ورينا مستشفيات زبالة بدل المستشفيات اللى بندخلها عشان نموت مش عشان نتعالج، ورينا أمن وأمان ورينا سكة حديد نعرف نموت فيها واحنا نظاف، ورينا أى حاجة إعمل معروف.. يا أخى راع الغلابة دول خلاص الأغنية خدوا حقهم فى ال30 سنة اللى فاتوا شوف بقى الغلابة قرب من دول وريحهم وصدقنى لو ريحتهم البلد هترتاح وانت هترتاح .. ومتنساش "الثورة قامت عشان دول" ياما اتبهدلوا. آه فيهم اللى غلط واللى سرق واللى ضرب بس ليه عشان يقدر يعيش. لو فضلت كده مش مراعيهم هيفضلوا يسرقوا ويضربوا ويموتوا لحد أما يجى عليك الدور إنت كمان زى اللى قبلك. ريح اللى تحت هيرتاح اللى فوق.