شَمِت فينا حسنى

لمؤاخذة يا معالى الرئيس شَمِت "حسنى" فينا ليه ؟؟
ضحك علينا فى القفص خلانا نتندم عليه !
رجعتنا لزمنه كتير والفرق بينكوا مش كبير !
كل الحكاية إنك بدقن الشفرة تحلقها بجنيه
. ..
لمؤاخذة يا معالى الرئيس رجعتنا لسنين عِجاف
ولا أمن فيها ولا أمان واللقمة بنغمسها حاف
وطلعت زيّه ديكتاتور والكرسى صابك بالغرور
ورئيس وزارتك فى السرير نايم ومتغطى بلحاف
. ..
لمؤاخذة يا معالى الرئيس خيبت أمل الشعب فيك
الناس كانت فاكراك "عُمر" والعدل كله بين إيديك
الناس كانت فاكراك كبير هتكون رئيس وزعيم خطير
لكن يا ريس للأسف "حسنى" ضحك علينا وعليك
. ..
لامؤاخذه يا معالى الرئيس خد الكلام من غير زعل
أخدنا فيك مقلب كبير وخيبة جتلنا بالعجل
ضيعت أحلام الشباب بعزقت دمه فى التراب
وطلعت مش قد الطموح ولا شفنا فيك ذرة أمل
. ..
لا مؤاخذة يا معالى الرئيس إحنا صبرنا عليك كتير
لازم هتقعد فى القفص وتعانى من نفس المصير
الشعب مبقاش إمعه ومعدش لابس بردعه
والثورة لسة مستمرة ومصر عايزة زعيم كبير
. .