شقاوة شعب

لما الشعب يهتف بسقوط الحاكم، لما الدستور يلغى محاكم، لما حصار الرأى يبئى جهاد، واللى بيحكم مصر واخدها عناد، يبئى اللى مالوش جمل ولا ناقة، لازم ييجى عليه يوم يتشاقى، وابئى ياريس قول دى شقاوة شعب، ونادى ياريس لجماعتك تيجى تفك الصعب، ما احنا ياريس برضو من المصريين، إيوه أنا مش منتخبك، وعمرى يوم ما هحبك، بس إنت الحاكم وأنا يدوب محكوم، ولو حد يوجه لك لوم، قول دى شقاوة شعب!!.
جيكا اتشاقى وفرح يوم ما أنت نجحت، ومات الجندى لما طلعت، ورفعت صباعك وشاورت، وقلت يا أمن اتعامل، وبأمر منى يبئى دمار شامل، إنت ناسى إن إحنا الشعب، واحنا اللى نعدى معاك الصعب، لا إخوان ولا سلفيين، لا جهاد ولا تكفيريين، وإن مرة تطلعنا نطالب، لازم تتحقق لينا مطالب ، ما إحنا ياريس مصريين، وإن حد فى يوم جالك يعتب، قولوا ياريس دى شقاوة شعب!!.
قول للأمن يرْجَع نارة ، أصل ماحدش سايب تاره، لازم تصدقنى ياريس، أنا مش مسطول وعمرى ما أهيس، حط إيديك فى إيد الشعب ، تعمل نهضة وهاتبقى ياريس نهضة شعب، مفيهاش سمع وطاعة، أصلها مش ناقصة نطاعة، وإن جالك حد يعاتبك قول له شقاوة شعب!!.
خلى كلامك برضو يخف، ولما تعوز تتكلم، حضر خطبك، نعرف قصدك، وشريطك مش هايسف، والتصقيف هايكون من صف لصف. برضو ياريس دى شقاوة شعب!!.