أقصى عقاب للمنتخب: حبسه مع مرسى والاستماع لخطاباته!

الخسارة المدوية للمنتخب المصري جعلت الشباب يطالب بمحاكمته محاكمة عسكرية، بينما طالب البعض الفريق السيسي بأن يكمل جميله ويفجر طائرة المنتخب، على الجانب الآخر ابتكر بعض الشباب طرقا جديدة لعقاب المنتخب أهمها حبس لاعيبة المنتخب مع مرسي في زنزانة واحدة، واجبارهم على الاستماع لخطاباته عن الشرعية، "فيتو كافيه" رصدت أبرز تعليقات الشباب..
أمير زين: وليه؟ دول عقابهم يدخلوهم زنزانة مرسي وينشهم خطبة 3 ساعات عن الشرعية، وهما حيفرفروا لوحدهم.
صباح بليغ: إحنا عزلنا مرسي وانتوا كسبتوا ماتش غانا.. خالصين !
خالد سليمان: الإخوان شمتوا في منتخب مصر.. وشوف عدل ربنا.. منتخب تركيا ومنتخب إسرائيل خرجوا من التصفيات ! هايشجعوا مين هما دلوقتي بقى؟!
محمد جبريل: ماتش مصر وغانا كان محتاج مرتضي منصور يعلق عليه!
عبد الرحمن أفندي: أما تلاقي استوديو التحليل للماتش كله زمالكاوية لازم تتأكد أن 6_1 ده أمر طبيعي..
مصطفي حلمي: أنا شايل هموم الجون فوق دراعاتي"إكرامي"..
الشالنير: مجدى عبد الغنى اصلا إخوان..
مصطفي حلمي: مصر أم الدنيا، وهتبقى قد الدنيا من كتر ما اتنفخت..
يسرا منعم: إلى الفريق أول عبدالفتاح السيسي: كمّل جميلك واضرب طيارة منتخب مصر بالمدفعية.. المنتخب ده مش لازم يعيش ليوم الاربع !!
الشارة: ستة واحد... مش بقولكوا روح الفانلة البيضا بتهفهف ع الملعب !
علاء سعودي: بتوع آسف يا مبارك بيقولوا إن أيام مبارك المنتخب كان أسياد أفريقيا دلوقتي حصالة أفريقيا.. وبتوع آسف يا مرسي بيقولوا إن المنتخب لعب كل ماتشاته فى عهد مرسي وكسب ثم خسر من غانا بعد 30يونيو..
محمد عمر: حسبي الله ونعم الوكيل..ع العموم إحنا اسفين يا مجدي.. تقدر تكمل ذل فينا براحتك ومفيش حد يقدر يتكلم..
فارس العبادي: معًا لمحاكمة لاعبي المنتخب محاكمة عسكرية !!
كريم ماجيك: أول مرة المؤيدين والمعارضين يتفقوا على حاجة واحدة وهى محاكمة المنتخب عسكريا..