حزب القراصنة !

فيه حزب حقيقي اسمه حزب "البايرتس" اللي ترجمتها بالعربي "القراصنة" وشعارهم قناع فانديتا اللي الإخوان زمان قالوا عليه بانديتا.. الحزب ده حزب حقيقي وموجود ومشارك بقوة في الانتنخابات.. بس ما تتخضوش مش في مصر احنا لسة ما وصلناش للمرحلة دي.
الحزب ده موجود في المانيا وعندهم برنامج انتخابي واضح وصريح وما يخرش المية ولا بقي بيجملوه ويقولك هندهن الشوارع برفان ولا يطلع واحد يلبس ماسك "بانديتا " ليل ونهار يوجع دماغهم هتافات ووعود براقة.. كل إلى بيعملوه أنهم بيتجمعوا في الإجازات ويعملوا مظاهرات "سلمية بجد" ويطالبوا بأن "الإنترنت" يبقي مجاني واي حاجة جوه جدولهم بيكون هدفها أنها في الآخر تخلي الإنترنت مجاني.. دي أجندتهم وده كل هدفهم في الحياة.
تقولي حزب ومقر ومتحزبين وعاملين فيها سياسيين وداخلين انتخابات عشان النت ؟! اقولك ايوه.. أبسلولتلي وبكل ثقة.. عندهم كل الأزمات تقريبا محلولة وما فاضلش غير أن النت يبقي مجاني عشان يحسوا أنهم مرتاحين.. عالم فاضية صحيح !