"حملة مقاطعة كروت الشحن" هاشتاج يسخر من الحكومة.. أكرم: بكرة يوم 25 يقطعوا الاتصالات.. وإنجى: المشكلة فى حكومة مرسى.. وآيات: الموبايل هيتحوِّل إلى كاميرا ومنبِّه

" حملة مقاطعة كروت الشحن".. هاشتاج جديد قام بتدشينه الثوار لمقاطعة كروت الشحن التى زادت أسعارها دونما أى مقدمات.
دكتور أكرم صابر "غلّوا الكروت النهارده.. بكرة يقطعوا الاتصالات يوم 25 تانى.. ما همَّ عبيد السلطان".
إنجى ويب، قالت "إنتو فاكرين إنكم أما تقاطعوا يبقى حلّيتوا المشكلة يا.. ياللى عامل الهاشتاج ده؟ المشكلة فى حكومة مرسى".
ويقول باسم طارق "يعنى الشركة مش مستحملة تخسر شهر مثلًا، دول على قلبهم أد كده".
آيات نور علَّقت "كده الموبايل هيتحوّل إلى إم بى ثرى وكاميرا ومنبّه وجيمز وشكرًا على كده".
إيمان علِى تقول "اللى هيتخرتق فى الحوار ده الناس المرتبطة.. سمَّعنى أحلى سلام للسناجل بقى".
آية بشر، قالت "يعنى أنا مش هاشحن تانى.. إيه ده، هو أنا كنت شحنت أولانى أصلًا.. يلَّا مش فارقة مقاطعة مقاطعة".
وقال أحمد عماد "ودى اللحظة اللى كل السناجل بيفرحوا فيها، مرسى هو الوحيد اللى بيراعى مشاعرنا.. هى دى العدالة الاجتماعية".
عمرو المنشاوى قال "أيها السادة الحضور.. إحنا لبسنا النهضة خابور".
وقال أحمد عماد "إحنا ذنبنا إيه، طبّقوا غلاء الأسعار على اللى انتخبوا مرسى واللى قالو "نعم" للدستور، وسيبونا فى حالنا".
وقالت هند ترك "طب أنا عندى فكرة.. طبَّقوا غلاء الأسعار علة اللى قالوا نعم للدستور".
وقالت رانيا زين "وتتكلم فى التليفونات ليه، خلّيها هىَّ اللى تتصل بيك وهى هتستخسر فيك حق المكالمة وبكده هتبقى الشركات هتجيب دُرَفْهَا".
وتضامنت العربية نوران مع الهاشتاج، وكتبت "هاشتاج مصرى صح.. المهم أنا داعمتكم ومقاطعة اللى عندى ما حدثت بياناتى واسمحوا لى أشحن.. أصلًا كده مرتاحة".
وقال سامح النجار "إشماعنا دى اللى كالتكوا أوى ما كل حاجة بتغلى فى البلد إشماعنا دى حسوا بالناس مش لاقية تاكل".
مصرية سنا، تقول" الهتاف الجديد.. عيش.. حرية.. دقايق مجّانية".
وقال أحمد لبيب "أخدت نهضة يا بيه أخدتى استقرار يا هانم الكابتن اللى ورا أخد نهضة؟ الست أم العيل بيعيط ده أخدتى نهضة؟".
وكتب مَن أطلق على نفسه القصاص أو الفوضى "مستنظر من شعب ساكت على حقه غير إنه يتركب من أى حد"!
وقالت هالة محمود "بسيطة نتفق كلنا نعمل مقاطعة عشان الشبكات ترجع عن قرار الزيادة ونتحدّاهم وماحدش يطلع عيّل ويشحن".