إبراهيم "البواب".. وعمرو موسى!

بعد يوم طويل من تغطية المظاهرات والاحتجاجات.. ومتابعة المؤتمرات "الحزبية" والندوات "الثورية" والبيانات "الحكومية".. وما حدث في "لجنة الخمسين" لتعديل الدستور "الإخواني".. واختيار "عمرو موسى" رئيسا لها..عدت إلى المنزل مرهقًا.. وكأن "شواكيش" تدق "أم" رأسي.. متمنيا وضع جسدى على أقرب سرير.. لكن "المفعوص" أبو نص لسان رفض أن يحقق لى هذه الأمنية.. وبادرنى قائلًا:
- مالك يا بابا.. حاثث بإيه.. قوللى متخبيش؟
- مفيش يا حبيبى.. مصدّع بس شوية.
- تحب أجيبلك عمو "إبراهيم" البواب!
- إبراهيم البواب!! وهييجى يعمل إيه إن شاء الله؟!
- ييجى يكشف عليك، ويقولك تأخد دوة إيه؟!
- إخص عليك يا مفعوص.. بدل ما تقوللى سلامتك وتجيبلى دكتور؟
- مش فارقة كتير يا بابا.
- إزاى مش فارقة.. البواب والدكتور والمهندس والمدرس والسواق... كل واحد ليه تخصص، وربنا خلقنا كده علشان دايما نكون في حاجة لبعض.
- تخثث إيه يا بابا.. إحنا في زمن "الكل في واحد..!"
- مش فاهم تقصد إيه؟!
- يعنى كله بيتكلم في كله.. النجار بيتكلم في السباكة.. والجزار بيتكلم في الصناعة.. وبتاع الطب بيفتى في الدين.. و"علاء ثادق" بتاع كله.. ثياثة وإعلام ورياضة وقانون وعلمانية واشتراكية.. بلاش دا كله.. دا "عمرو موسى" بذات نفسه بقى "رئيث لجنة الخمثين".. يعنى ما جتش على إبراهيم البواب لما يتكلم في الطب.. لازم نشجعه ونديله فرثة..!
- ههههههههه.. الله يجازى شيطانك يا مفعوص.. دا أنا افتكرتك بتتكلم بجد.
- يا بابا إحنا في بلد العجايب.. يعني تلاقى "رقاثة" درجة تالتة طالعة في أحد البرامج والمذيعة بتأخد رأيها في الأمن والأمان، والثياثة والاقتثاد.. والفقه والتشريع.. و"الملط" و"العريان"..!!
- ملط وعريان!.. وطّى صوتك.. أُمك تسمعنا!!
- هههههههههه.. إنت خايف ليه كده.. أنا قثدى رأيها في المثتشار "جودت الملط"، والدكتور "عثام العريان"..!!
- آه.. افتكرت حاجة أبيحة!!
- لا أبيحة ولا حاجة.. المهم الصداع اختفى ولّا لثه؟!
- صداع إيه؟!!