الفاشلون في الفشل !

يعني لما تحب تعمل حاجة يا تعملها صح يا بلاش.. يعنى مش علشان تموت واحد زى وزير الداخلية ياعمنا الأهبل تروح تموت ناس تانى والمستهدف اللى أنت متغاظ منه عايش.. ده صحيح فشل ويأس وقمة الإحباط اللي أكيد ريحته بقت وحشة من تحت الباط بس ده ما جاش في مصلحة الفالح اللي خطط لكده ولا للحظة واحدة.. يعينى ما فكرش أن الإعلام العالمي حتي اللي كان متعاطف معاهم هيبتدي يقول عليهم إرهابيين هو كمان.. أيتها الجماعة الفاشلة....

بس لو حبيت تبقي فاشل لازم تتعلم تبقي فاشل.. إنما كمان مش عارف تبقي فاشل؟
يعني أعدتوا يجي 60 سنة هتموتوا على حكم مصر ولما جالكم الحكم عملتوا فيها عبط وعملتلونا فنكوش وكوارث غير طبيعية.. فشل ده ولا مش فشل؟
لما الناس قالت إنكم المفروض تمشوا من الحكم برضه أعدتوا تخنقوا عليهم وعاملين ودن من طين والتانية من عجين.. فشل ده ولا مش فشل؟
وقعتوا من على كرسي الحكم في 3 أيام يعني حتي طلعتوا أفشل من النظام القديم في وقوعكم وأعدين تقولوا أصل الدولة العميقة والدولة في الشرابات.. فشل ده ولا مش فشل؟
وكمان وانتوا بتقعوا بدل ما تقعوا لوحدكم شديتوا ناس كتيرة وراكم ماتت في اعتصاماتكم الفاشلة اللي أصلا ما حدش كان عارف إيه مطالبها.. شعب وخلع رئيس وهيعمل انتخابات تانية.. انتوا بقي مش عايزين انتخابات ؟ فشل ده ولا مش فاشل ؟
وأخيرا بدأتوا تستعينوا بالإرهاب.. طب يعني هنقول إيه على رأي المثل البلدي اللي بيقول.. اتلم "إخوان" على "تنتن" واحد" حالق دقنه والتاني "......".
وإذا كانت بتزعلكم كلمة يا فاشل فأنا أقدر أقولها بملء فمي "يا فاشل يا فاشل يا فاشل" كما قالها الأستاذ حسن حسني لكريم عبد العزيز في "الباشا تلميذ".